Forcat e sigurisë së Birmanisë kanë lënë të vdekur tre persona të hënën, pasi aktivistët pro demokracisë u kanë kërkuar qytetarëve që ta mbështesin fuqishëm fushatën kundër juntës ushtarake.

Pas ditës më të përgjakshme që nga puçi i 1 shkurtit, kur të shtunën u vranë 114 persona, me mijëra persona kanë pushtuar të hënën rrugët e qyteteve më të mëdha, të vendosur për ta kundërshtuar rikthimin e sundimit ushtarak pas një dekade të kalimit në demokraci.

Një burrë ka mbetur i vrarë dhe disa të tjerë janë plagosur nga forcat e sigurisë në qytetin Yangon. Dy të tjerë janë vrarë në një qark tjetër të Yangonit.

Ndërkaq në përpjekje për shpërndarjen e barrikadave të vendosura nga protestuesit, forcat e sigurisë kanë qëlluar edhe një ekip të Kryqit të Kuq.