Një hetim në Kolumbi ka zbuluar se 6.402 civilë janë vrarë nga ushtria mes vitit 2002 dhe 2008, dhe në mënyrë false u regjistruan si luftëtarë të armikut.

Numri i të vrarëve, të njohur si “fals pozitivë”, është gati trefishtë më i madh se që ishte llogaritur më herët.

Hetimi është bërë nga një gjykatë speciale që po shikon krimet e bëra gjatë konfliktit gjysmëshekullor mes ushtrisë dhe rebelëve të krahut të majtë.

Në vitin 2016 u nënshkrua një marrëveshje paqeje për t’i dhënë fund konfliktit.

Skandali “fals pozitiv” së pari doli në skenë në vitin 2008, por mendohet se kjo praktikë daton që nga vitet 1980-ta.

Më tepër se 1700 persona janë dënuar për rolin e tyre në skandalin “fals pozitiv”.

Pjesëtarët e ushtrisë kanë dhënë dëshmi në disa raste gjyqësore gjatë dekadës së fundit.

Në një rast, tetë ushtarë janë burgosur pasi kishin marrë dhunshëm katër fermerë nga shtëpitë e tyre, i kishin qëlluar prapa shpine dhe i kishin veshur si rebelë.

Gjykata e Paqes ka thënë se nuk e përjashton mundësinë që numri i viktimave të jetë më i madh, pasi hetimet janë në fazën fillestare.