Numri i të infektuarve me koronavirus në gjithë botën është afër të arrijë në 100.000, ndërkohë numri i të vdekurve si pasojë e këtij virusi ka kaluar 3.000-shin.

Në SHBA, në shtetin e Washingtonit, të hënën, është shënuar viktima e gjashtë nga koronavirusi, njofton Reutersi. Ndërkohë CNN njofton se për këtë, janë mbyllur të paktën 48 shkolla nga frika e përhapjes së këtij virusi.

Numri i të infektuarve në Francë është rritur në 191. Dje ishin 120. Tre persona kanë vdekur në këtë vend si pasojë e koronavirusit. Edhe në Itali është rritur numri i të vdekurve, nga 41 sa ishte dje në 52.

Rastet e para me koronavirus të hënën janë paraqitur edhe në 10 shtete: Senegal, Jordani, Tunizi, Islandë, Çeki, Arabi Saudite, Portugali, Indonezi, Andorrë dhe Armeni.

Tashmë, të gjitha shtetet perëndimore të Evropës janë të prekura nga ky virus që shpërtheu në Kinë, në fund të vitit të shkuar.

E në vatrën e këtij virusi, në Wuhan të Kinës, është regjistruar rënie drastike e të prekurve.

Vlerësohet si shenjë se, të paktën në këtë pjesë të botës, koronavirusi po zhduket.