Të paktën nëntëmbëdhjetë persona humbën jetën në një aksident në Rusi

01 December 2019 16:48

Një autobus ka rënë nga ura, duke lënë të vdekur 19 persona. Autobusi që po udhëtonte nga qyteti Sretensk drejt Chitas, ka rënë në lumin e ngrirë Kuenga, 6 mijë kilometra në lindje të Moskës.

Autoritetet në Rusi kanë thënë se në momentin e aksidentit, në autobus ishin 43 udhëtarë.

Mediat kanë njoftuar se autobusi ka humbur kontrollin dhe ka rënë nga ura për shkak se njëra rrotë e tij doli nga vendi.

Ekipet e shpëtimit kanë tentuar që me shpejtësi t’i nxjerrin të mbijetuarit nga autobusi i cili ka filluar të fundoset shkaku i plasaritjes së akullit, raporton Reuters, transmeton KTV.

Siguria e rrugëve në Rusi është një prej më të këqijave në botë. Sipas policisë, vetëm gjatë vitit të kaluar, 18 mijë e 214 njerëz kanë vdekur nëpër aksidente rrugore.

Ky numër, sa për krahasim, është më i madh sesa numri i ushtarëve rusë që vdiqën në Luftën e Afganistanit, gjatë viteve 1979-1989, e që ishte 15 mijë.

© KOHA

Komentet

Shto koment

Të ngjashme