Botë

Guterres: Bota s’është “në rrugën e duhur” për të frenuar ngrohjen globale

Sekretari i Përgjithshëm i Kombeve të Bashkuara, Antonio Guterres ka thënë se bota nuk është “në rrugën e duhur” që të kufizojë rritjen e temperaturave globale për 1,5 gradë Celsius.

Këto komente ai i bëri gjatë vizitës që po zhvillon në Zelandën e Re. Duke folur për mediet, së bashku me kryeministren e Zelandës së Re, Jacinda Ardern, Gutteres paralajmëroi për rreziqet që i kanosen botës duke mos adresuar ndryshimet klimatike.

“Ndryshimet klimatike po ecin më shpejt sesa ne... katër vjetët e fundit kanë qenë vitet më të nxehta të regjistruara ndonjëherë”, ka thënë Guterres, transmeton rel.

Sipas një marrëveshjeje për klimën e arritur në Paris më 2015, shtetet janë zotuar se do të kufizojnë rritjen e ngrohjes globale për më shumë se 1,5 gradë Celsius.

Sekretari i Përgjithshëm i OKB-së vizitoi sot Zelandën e Re në kuadër të turneut të tij në shtetet e Paqësorit, që ka në fokus ndryshimet klimatike. Pas Zelandës së Re, ai do të qëndrojë në Tuvalu, Vanuata dhe Fixhi.