Kryeministri i Republikës së Kosovës, Ramush Haradinaj, priti në takim ish-kryeministrin suedez dhe bashkëkryesuesin e Këshillit Evropian për Marrëdhënie Ndërkombëtare (ECFR), Carl Bildt dhe një delegacion nga Suedia, bëhet e ditur përmes një komunikate për media.
“Zhvillimet e fundit politike në vend, proceset integruese euro-atlantike për Kosovën dhe gjithë rajonin e Ballkanit Perëndimor, ishin temat që u diskutuan në këtë takim”, thuhet në komunikatë, transmeton Koha.net.
Haradinaj theksoi se, “Kosova po përshpejton procesin e përmbushjes së Agjendës së Reformës Evropiane dhe të Marrëveshjes së Stabilizim Asociimit me qëllim të përafrimit me BE-në, me synimin që deri në fund të vitit të marr statusin e vendit kandidat për anëtarësim në familjen evropiane”.
“Anëtarësimi i Kosovës në NATO dhe në OKB është i rëndësishëm dhe do të kontribuonte në paqe dhe stabilitet jo vetëm për Kosovën, por edhe për tërë rajonin”, ka thënë Haradinaj.
Ish-kryeministri suedez dhe bashkëkryesues i Këshillit Evropian për Marrëdhënie Ndërkombëtare (ECFR) , Carl Bildt, e uroi kryeministrin Haradinaj dhe popullin e Kosovës për shënimin e 10 vjetorit të pavarësisë dhe të arriturat brenda këtyre viteve. Ish-kryeministri suedez u interesua për zhvillime të ndryshme në Kosovë dhe në rajon.
-
22 shkurt 2018 18:43
-
Shpërndaje në: