Arbëri

KDTP reagon për heqjen e flamurit të Turqisë në Prizren

Partia Demokratike Turke e Kosovës, përmes një komunikate për media ka reaguar pas pamjeve që shpërfaqin heqjen e flamurit të Turqisë nga një shtyllë në një rrugë në Prizren.

“Flamuri turk, përpos që është flamur i Republikës së Turqisë ai është edhe flamur i komunitetit turk të Kosovës. Sulmi i bërë ndaj flamurit turk konsiderojmë jo vetëm si sulm i bërë komunitetit turk por edhe një akt kundër vlerave demokratike dhe vlerave multietnike dhe vlerave Evropiane të Kosovës”, thuhet në reagimin e KDTP-së. “Dëshirojmë të theksojmë se sulme të tilla të cilët po përsëriten kohët e fundit, janë duke e shqetësuar komunitetin tonë, në këtë aspekt presim që sa më parë akterët e këtij sulmi të sillen para drejtësisë”, thuhet tutje aty.

Kjo parti kërkon nga institucionet e Kosovës, nga presidenti, Qeveria dhe parlamenti  të dënohet ashpër këtë akt dhe të ndërmarrin hapat zyrtare për zbardhjen e këtij rasti.

Kujtojmë se sot në media ka qarkulluar një video të cilën e kanë incizuar disa persona duke hequr flamurin e Turqisë, i cili valonte në një rrugë të Prizrenit.

Turqia është ndër vendet e para që ka njohur pavarësinë e Kosovës.