Ministrja Hoxha: Rruga e Kosovës drejt BE-së e ndarë nga Serbia Foto: Koha / ilustrim

Ministrja Hoxha: Rruga e Kosovës drejt BE-së e ndarë nga Serbia

06 February 2018 15:26

Sot është bërë e ditur Strategjia e Bashkimit Evropian për zgjerim në Ballkanin Perëndimor.

Ministrja e Integrimit Evropian, Dhurata Hoxha, me këtë rast tha se “është tejet pozitive që Bashkimi Evropian e ka konfirmuar se Kosova e ka vendin e vet në BE dhe e ka rrugën e vet të ndarë nga Serbia në këtë proces, fakti që BE e trajton procesin e aderimit të Kosovës në BE të ndarë nga Serbia”.

Në rrjetin social, ministrja Hoxha ka ftuar “të gjitha institucionet e Kosovës që të jemi unikë për rrugëtimin e Kosovës drejt BE-së, sepse jemi popull dhe shtet evropian dhe nuk kemi ndonjë alternativë tjetër. Apeloj që të kemi konsensus ndër-institucional dhe të kemi një qëndrim të përbashkët mes Qeverisë, Kuvendit dhe institucioneve të tjera shtetërore dhe t’i japim prioritetin më të madh zbatimit të Marrëveshjes së Stabilizim dhe Asociimit dhe reformave që duhet t’i bëjmë”.

Në vazhdim postimi i plotë i ministres Hoxha në rrjetin social:

“Mirëpres Strategjinë e Bashkimit Evropian për anëtarësimin e shteteve të Ballkanit Perëndimor, pjesë e të cilës është edhe Kosova. BE na e ka hapur derën që të bëhemi pjesë e saj, por ne jemi ata që duhet të ecim nëpër këtë derë. Në këtë fazë, kemi pritur që të specifikohen më konkretisht hapat rreth procesit integrues të vendit tonë, por, megjithatë rruga jonë drejt BE-së nuk ka alternativë.

Është tejet pozitive që BE ka konfirmuar se Kosova e ka vendin e vet në BE dhe e ka rrugën e vet të ndarë nga Serbia në këtë proces. Fakti që BE e trajton procesin e aderimit të Kosovës në BE të ndarë nga Serbia, për mua është një njohje e shtetësisë së Kosovës, përkundër mosnjohjes nga disa shtete anëtare të BE-së dhe rezistencës që kanë shfaqur disa shtete që Kosova fare të mos përfshihet në këtë strategji.

Po ashtu, është tejet pozitive që BE kërkon kategorikisht që Kosova dhe Serbia të arrijnë një marrëveshje juridikisht të detyrueshme si parakusht për anëtarësimin e tyre në BE.

Të gjitha detyrat që ne duhet t’i kryejmë janë të përcaktuara qartë në Marrëveshjen për Stabilizim dhe Asociim, agjendën evropiane për reforma dhe programin për reforma ekonomike. Ne vetëm duhet t’i zbatojmë këto dhe sa më shpejtë që këtë e bëjmë, aq më shpejtë ecim përpara drejt anëtarësimit në BE.

Shfrytëzoj rastin të ftoj të gjitha institucionet e Kosovës që të jemi unik për rrugëtimin e Kosovës drejt BE-së sepse jemi popull dhe shtet evropian dhe nuk kemi ndonjë alternativë tjetër. Apeloj që të kemi konsensus ndër-institucional dhe të kemi një qëndrim të përbashkët mes Qeverisë, Kuvendit dhe institucioneve të tjera shtetërore dhe t’i japim prioritetin më të madh zbatimit të marrëveshjes së stabilizim dhe asociimit dhe reformave që duhet t’i bëjmë.

Vetëm kështu i shërbejmë qytetarëve tanë dhe vetëm kështu do të bëhemi pjesë e BE-së, aty ku e kemi vendin.”

© KOHA. Të gjitha të drejtat janë të rezervuara.

Komentet

Shto koment

Të ngjashme