Arbëri

Kërkohet përgjegjësi institucionale për vdekjet në vendin e punës

Ka arritur në 16 numri i qytetarëve të Kosovës që kanë vdekur në vendin e punën që nga janari i këtij viti.

Koalicioni për Drejtësi Sociale, i përbërë nga 8 organizata joqeveritare e sheh shqetësues faktin e mos reagimit institucional karshi këtij realitetit.

“Raportimet e mjaftuara me shifra, të pashoqëruara më të dhënat e kompanive dhe raporteve publike zyrtare, si dhe mungesës së reagimit dhe masave konkrete të përgjegjësisë, tregojnë për një situatë alarmante përtej çdo etike e vlere humane. Nga të gjitha rastet e raportuara, deri më tani nuk ka as edhe një të dhënë se ndaj një punëdhënësi apo kompanie është kryer ndjekje penale”, thuhet në deklaratën për media të këtij organizimi.

Koalicioni Për Drejtësi Sociale u ka bërë thirrje të gjitha institucioneve publike përgjegjëse që të mobilizohen në nivel kombëtar dhe të adresojnë me urgjencë rastet e pësimeve me jetë në vendin e punës, të thërrasin në përgjegjësi organet e mbikëqyrjes, implementimit dhe ndjekjes penale, dhe të identifikojnë hapat konkretë që çojnë në parandalimin e humbjeve me jetë të punëtorëve në vendin e tyre të punës.

Të hënën u raportua se punëtori 31 vjeçar nga komuna e Istogut, me inicialet G.L., ka vdekur si pasojë e lëndimeve në vendin e tij të punës . Kjo është vdekja e 16-të e raportuar vetëm për këtë vit.

Koalicioni për Drejtësi Sociale u themelua në vitin 2015, më qëllim të veçantë për të ndikuar dhe avancuar drejtësinë sociale në Kosovë me anëtarë:

Iniciativa Kosovare për Stabilitet - IKS,

Friedrich Ebert Stiftung, Prishtina Office - FES,

Bashkimi i Sindikatave të Pavarura të Kosovës - BSPK,

Olof Palme International Center,

OJQ Lens,

Instituti Columbus,

Partners Kosova,

Leadership and Growth Council - LGC