Nga kabineti i Kryeministrit të Republikës së Kosovës, njoftohet se Ramush Haradinaj, ka pritur në takim deputetin e Nismës për Kosovën Milaim Zeka.

Thuhet se me të ka biseduar për temat e aktualitetit politik, për mirëvajtjen e koalicionit qeverisës dhe për një dinamikë të re në qeverisjen e vendit.

“Deputeti Zeka është anëtar i Komisionit Parlamentar për Media, së këndejmi kryeministri Haradinaj është interesuar rreth ligjit për transmetuesin publik, RTK”, thuhet në njoftim.

Deputeti Zeka e ka njoftuar kryeministrin për nismën legjislative të këtij komisioni për amandamentimin e këtij ligji, i cili rregullon fushëveprimin e transmetuesit publik, Radiotelevizionit të Kosovës (RTK).

Emri i deputetit Zeka përveç incidentit me deputetin e Vetëvendosjes Frashër Krasniqi, është apostofuar edhe në rastin e sulmit ndaj gazetari Vehbi Kajtazi.