Arbëri

Kurti: Elsie mundësoi komunikimin e kulturës sonë me botën

Lideri i Vetëvendosjes Albin Kurti, me hidhërim ka pranuar lajmin për shuarjen nga jeta të albanologut kanadez Robert Elsie.

Kurti thotë se me përkthimet e letërsisë shqipe në gjuhët e tjera, ai ka mundësuar komunikimin e kulturës tonë me botën.

Postimi i Kurtit në Facebook:

Mësuam me hidhërim këtë mëngjes për vdekjen e Robert Elsie-t, studiuesit kanadezo-gjerman që ka dhënë shumë për kulturën shqiptare.

Kontributin e Elsie-t në studimet albanologjike apo në përkthimet e tij mua nuk më takon ta vlerësoj, atë le ta gjykojnë specialistët.

Megjithatë, duhet përmendur me shumë mirënjohje aktiviteti i tij i pandalshëm. Në një moment të amullisë vlerore e kulturore, kur banalja është bërë shumë pjellore, Robert Elsie me përgatitjen e publikimin online të antologjive të letërsisë dhe koleksioneve të folklorit e fotografisë, ai krijoi një pasqyrë ku shqiptari modern të mund të rrokte një gjerësi të kulturave e historive të kombit të tij. E me përkthimet e letërsisë shqipe në gjuhë të tjera ai ka ndihmuar në komunikimin e kulturës sonë me botën.

Për këto e për shumë të tjera do ta kujtojmë e do ta respektojmë Robert Elsie-n.