Arbëri

8 vatra zjarri në Shqipëri

Gjatë 24 orëve të fundit në të gjithë vendin janë shënuar 8 vatra zjarri në disa qarqe të vendit.

Në operacione për shuarjen e zjarreve janë angazhuar 70 punonjës zjarrfikës, 14 automjete zjarrfikëse, 150 forca ushtarake, rreth 50 punonjës të Pyjores e të bashkive dhe vullnetarë, të mbështetur edhe nga helikopterë.

Specialistët e Emergjencave Civile, janë duke mbajtur situatën në monitorim të vazhdueshëm në të gjithë vendin.

Drejtoria e Përgjithshme e Emergjencave Civile, në Ministrinë e Punëve të Brendshme përsërit thirrjen ndaj të gjithë qytetarëve që në rast se konstatojnë zjarre, të njoftojnë menjëherë në numrat e emergjencave 112, 129 dhe 128.

QARKU SHKODËR Disa vatra të vogla zjarri janë ende aktive në Malin e Taraboshit në Shkodër. Zjarrfikëset dhe forcat ushtarake të ndihmuar nga banorë të zonës kanë punuar gjatë gjithë ditës për të izoluar flakët. Rreth 30 forca ushtarake janë angazhuar ditën e sotme për të shuar vatrat e mbetura. Në operacionin e djeshëm një punonjës i shërbimit zjarrfikës të Shkodrës mbeti i plagosur dhe ndodhet në spital jashtë rrezikut për jetën.

Në fshatin Bushat Shkodër ka rënë zjarr në një sipërfaqe me shkurre dhe pisha pranë një ish-reparti ushtarak. Zjarri i favorizuar nga era preku një sipërfaqe të madhe. Forcat zjarrfikëse dhe ato të ushtrisë kanë punuar për disa orë duke izoluar dhe më shuar të gjitha vatrat e zjarrit.

Vatra e zjarrit në Malin e Munellës në Pukë është ende aktive. Forca të bashkisë, të pyjores dhe banorë të zonës kanë punuar për të izoluar zjarret. Puna për shuarjen e tyre vazhdon edhe ditën e sotme me mjete rrethanore për shkak të terrenit të thyer malor.

QARKU LEZHË Vijon operacioni për shuarjen e një zjarri në një zonë malore në fshatin Lajthizë të Mirditës. Forca zjarrfikëse dhe ushtarake kanë punuar gjatë gjithë ditës së djeshme për të izoluar flakët, por për shkak të terrenit malor nuk kanë mundur t’i shuajnë plotësisht. Ditën e sotme 30 forca ushtarake janë duke operuar për të shuar vatrat e mbetura të zjarrit.

Në qytetin Laç, ka rënë zjarr në një sipërfaqe me shkurre dhe pisha pranë një ish-reparti ushtarak. Falë ndërhyrjes së menjëhershme të zjarrfikësve dhe forcave ushtarake është bërë e mundur që zjarri të shuhet plotësisht duke mos rrezikuar zonën e banuar.

QARKU DIBËR Në fshatin Lurë Dibër, ka rënë zjarr në një sipërfaqe me shkurre dhe pisha. Për shkak të terrenit malor zjarrfikëset nuk kanë mundur të ndërhyjnë. Sot në mëngjes në operacion janë angazhuar edhe 30 forca ushtarake.

QARKU BERAT Në fshatin Roshnik Berat ka rënë zjarr në një sipërfaqe me shkurre dhe ullishte. Shërbimi zjarrfikës ka shkuar në vendngjarje dhe ka shuar flakët. Si pasojë e zjarrit u dogj një sipërfaqe prej rreth 3 dynym me shkurre dhe 40 rrënjë ulliri.

Në hyrje të qytetit Poliçan, ka rënë zjarr në një sipërfaqe me pisha. Pas ndërhyrjes së zjarrfikësve zjarri është shuar. Si pasojë u dogj një sipërfaqe e vogël me shkurre dhe disa pemë pishe.