Rohde: Zbatimi i Marrëveshjes së Ohrit, përfshirë Asociacionin, është vendimtar
Foto: KOHA
Ambasadori i Gjermanisë në Kosovë, Jorn Rohde, e ka mirëpritur përmbylljen e fazës së parë për anëtarësimin e Kosovës në Këshillin e Evropës.
Rohde ka thënë se pas vendimit të javës së kaluar për vizat, vendimi i sotëm i KiE-së e ka sjellë Kosovën sërish pranë familjes evropiane.
“Pas vendimit të javës së kaluar për vizat, votimi i sotëm i KiE-së për përcjelljen e aplikimit të Asamblesë Parlamentare e sjell vendin sërish më pranë familjes evropiane. Japim mbështetje të plotë në këtë hap”, ka shkruar ai në Twitter.
Ai më tej ka përmendur zbatimin e marrëveshjes së Ohrit të arritur midis Kosovës dhe Serbisë më 18 mars, duke përfshirë Asociacionin e komunave me shumicë serbe.
“Urimet e mia për të gjithë kosovarët! Vazhdimi i zbatimit të Ohrit duke përfshirë Asociacionin e komunave me shumicë serbe, është vendimtar për të ecur përpara”, ka thënë ai.
