Mesazhe të qarta u ka dhënë liderëve politikë në Prishtinë përfaqësuesja e lartë e BE-së për politikë të jashtme dhe siguri Federica Mogherini . Ajo ka thënë se liberalizimi i vizave për Kosovën është në duart e deputetëve të Kuvendit.
Sipas Mogherinit, është koha e fundit që të miratohet marrëveshja e demarkacionit, e cila do të zhbllokojë më pas lëvizjen e lirë pa viza për qytetarët e Kosovës,r aporton KTV.
Mogherini ka kërkuar që të ketë konsensus politik për ratifikimin e kësaj marrëveshjeje.
Mysafires nga BE-ja, kryeministri Isa Mustafa i ka kërkuar ndihmë për ratifikimin e demarkacionit të kufirit me Malin e Zi.
Mustafa ka thënë se mosplotësimi i këtij kriteri për liberalizmin e vizave, vjen pas kundërshtimit të opozitës dhe mungesës së deputetëve serbë në Kuvend.
Kryeministri Mustafa ka kërkuar nga Mogherini që të përkrahë kthimin e listës serbe në institucionet e Kosovës.
Ai ka shprehur gatishmërinë për vazhdimin e dialogut me Serbinë, por ka thënë se një gatishmëri e tillë nuk është nga Serbia.
Presidenti Thaçi, ka thënë se Përfaqësuesja e Lartë e BE-së, Federica Mogherini, u ka dhënë përkrahje procesit të integrimit evropian dhe hapave konkretë e të menjëhershëm për liberalizimin e vizave.
Ndërsa në njoftimin e kuvendi thuhet se Kryeparlamentari Veseli, ka ritheksuar qëndrimin e vazhdueshëm të Kuvendit të Kosovës që sapo të vijë marrëveshja e shënjimit të kufirit me Malin e Zi nga Qeveria, ajo do të procedohet në seancë.
“Ne do t’i përmbushim të gjitha detyrimet tona ndaj Bashkimit Evropian si institucione dhe si popull”, citohet të ketë thënë Veseli.
-
4 mars 2017 20:02
-
Shpërndaje në: