Arbëri

“Qytetarët që jetojnë nëpër ndërtesa të larta nuk e dinë ende rrezikun se ku jetojnë”

Shyqeri Kabashi nga Kolegji “Biznesi”, ka thënë të ketë argumente që certifikimin e personave për trajnim për përdorimin e aparateve të zjarrit e bën ndërmarrja ndërtimore e cila merret me tregti.

Në emisionin “Puls” të KTV-së, ku u diskutua për degradimin dhe pasigurinë në ndërtesat e banimit, Kabashi i ftoi organet kompetente që t’i vërtetojnë pohimet e tij.

“Për të mos ardhur deri tek tragjedia, duhet të dihet çfarë lloji i ashensorit duhet të vendoset, sa është i përballueshëm, sa kate i ka objekti, rryma në cilin vend është e vendosur, çfarë lloji i kabllove është përdorur, çfarë temperature duhet me pas, ku janë hidrantët e vendosura, ku dëshirojmë ne apo ku duhet të jenë, ku duhet të jenë aparatet kundër zjarrit, pra që qytetari duhet të jetë ai i pari që duhet të merret me shuarjen e zjarrit deri sa të vijnë zjarrfikësit në ndërtesë. As ato pajisje minimale nuk i kemi. Në Tiranë që është djegur një grua shtatzënë dhe askush nuk merr përgjegjësi”, tha Kabashi.

Ai thotë se shumica e qytetarëve nëpër ndërtesa të larta nuk e dinë ende rrezikun se ku jetojnë dhe se gjithmonë nisen prej asaj nuk ka ndodhë dhe nuk do të ndodhë.

“Tek banesat e vjetra ka mundësi kyçjeje nga zjarrfikësit kurse tek banesat e reja nuk ka mundësi kyçjeje për ta. Sugjerimi është të vetëdijesohemi që këto ndërtimet e rejat duhet të bëhen me parametra dhe të veprohet sipas këtij ligji, edhe nëse është i keq, dhe të amandamentohet urgjentisht”, u shpreh Kabashi.