Arbëri

Hovenier: Duhet garantuar drejtësi për familjet e të pagjeturve

Ambasadori amerikan në Kosovë, Jeff Hovenier, ka thënë se duhet të bëhet më shumë për të sjellë drejtësi për familjet e të pagjeturve.

Në Ditën Kombëtare të të Pagjeturve, Hovenier ka thënë se SHBA-ja qëndron me familjet që presin ende përgjigjet për më të dashurit e tyre.

“Sot, në Ditën Kombëtare të Personave të Zhdukur të Kosovës, ne qëndrojmë pranë familjarëve të cilëve edhe pas më shumë se 20 vjetëve, ende u mungojnë përgjigjet për fatin e të dashurve të tyre të zhdukur. Duhet bërë më shumë për të garantuar drejtësi dhe përmbyllje për këto familje dhe ata që i humbën”, ka shkruar ambasadori Hovenier në Twitter.

Mbi 1600 persona ende janë të zhdukur nga lufta e Kosovës. Dita Kombëtare e të Pagjeturve shënohet në datën e masakrës së Mejës.

Para 23-vjetësh, më 27 prill 1999 forcat serbe rrethuan Rekën e Keqe dhe Lugun e Carragojës në rrethinën e Gjakovës. Në një operacion të planifikuar, u ndërprenë të gjitha rrugët duke lënë të hapura vetëm dy në drejtim të Mejës. Grumbullimi i meshkujve në grupe filloi në mëngjes, në një bilanc të tmerrshëm që goditi 15 fshatra të rrethit të Gjakovës. U ekzekutuan 376 persona, në një prej masakrave më të mëdha në Kosovë. Të vrarë në këtë masakër mbetën djemtë e burrat në grupe nga mosha 15-60 vjeç. Atë ditë asnjëri nga të ndalurit nuk arriti të dilte i gjallë nga Meja dhe pas luftës trupat e masakruar të tyre, disa u gjetën nëpër varreza masive nëpër Kosovë kurse të tjerët ka informacion se janë ende diku nëpër Serbi.