KEDS ka njoftuar se rritja e çmimeve të energjisë elektrike ka shkaktuar edhe rritje të madhe të vlerës së importit të energjisë. KEDS dhe KESCO gjatë tetorit të këtij viti, pra, për një muaj, përkundër motit të mirë, ka importuar 9,15 milionë euro energji elektrike, “një rritje enorme nga 1,5 milionë euro sa ishte në periudhën e njëjtë të vitit të kaluar”, ka theksuar KEDS.

Kjo rritje, sipas KEDS-it, ka rrjedhur nga çmimet ekstreme dhe rritjes së kërkesës.

“KEDS dhe KESCO ka blerë gjatë tetorit energji elektrike me çmim mesatar prej 242 euro për megavat/orë, një rritje prej gati pesëfish nga tetori i vitit 2020, kur energjia elektrike ishte importuar me çmim mesatar prej 49 eurosh për megavat/orë. Konsumi është rritur për 18 për qind në krahasim me periudhën e njëjtë të vitit të kaluar”, thuhet në një komunikatë.

Për shkak të rritjes së konsumit, “KEDS dhe KESCO është detyruar që të importojë gjatë muajit tetor 37,753 megavat orë energji elektrike. Trendi i rritjes së konsumit ka vazhduar edhe gjatë nëntorit, sikurse edhe blerja me çmime të larta, madje mbi ato të muajit tetor”.

Me rënien e temperaturave, pritet të rrisë tutje konsumin, dhe si rrjedhojë edhe nevojën për import shtesë, thotë KEDS, pasi prodhimi vendor është i kufizuar.

“Kështu, llogaritet të ketë kosto astronomike dhe të papërballueshme jo vetëm për KEDS dhe KESCO por për të gjithë qytetarët e Kosovës”.