Arbëri

PSD-ja ironizon me Kurtin për takimin me Vuçiqin

PSD-ja ka mbajtur një aksion në sheshin “Zahir Pajaziti” në Prishtinë, ku ka ironizuar me takimin e sotëm që kryeministri i Kosovës, Albin Kurti, pati në Bruksel me presidentin e Serbisë, Aleksandar Vuçiq.

PSD-ja ka publikuar një pano të madhe me foton e takimit, ndërsa në të shkruante “Fake News”.

Ndër të tjera në këtë pano shkruante: “Kjo është montazhë. Ky takim nuk ka ndodhur. Albini nuk e takon Vuçiqin pa kërkuar falje Serbia”.

PSD-ja ka ironizuar me deklaratat që Kurti kishte dhënë më herët.

“Jemi këtu për ta luftuar dezinformimin. Fotoja që po e shihni këtu është montazh. Një takim i tillë nuk ka ndodhur kurrë. Një takim i tillë nuk do të ndodhë pa e njohur Serbia Republikën tonë; një takim i tillë nuk bëhet pa ardhur kërkim- falja nga Serbia, e pa u zbardhur fati i të pagjeturve. Kryeministri ynë ka thënë kështu, s’ka si të jetë ndryshe. Eksponentë dashakëqinj nga mediat e partitë politike po duan ta njollosin figurën kristal të kryeministrin tonë. Ata duan t’i pengojnë e t’i fshehin të arriturat tona kolosale. Qytetarë të dashur, ju duhet të keni kujdes. Bota është e mbushur plot kurthe, gënjeshtra dhe armiq. Gjërat që i shihni, nuk i shihni në tërësinë e tyre; ato që i dëgjoni nuk u’a kuptoni prapaskenat. Prandaj duhet ta ndjekim linjën: të shohim me syrin e Partisë e ta dëgjojmë fjalën e saj. Ekziston çfarë thotë Partia: dëgjoj Partinë, prandaj jam. Sy e veshë i kemi vigjilencë për Partinë. Ne tregojmë, ajo na udhëzon. Ajo i sheh të gjitha falë besnikërisë tonë”, është thënë nga PSD-ja.