Dy të dyshuarit për keqpërdorim të detyrës gjatë zgjedhjeve dhe marrje ryshfeti në lidhje me vota kanë dalë para trupit gjykues në Gjykatën Themelore të Prishtinës. Seanca u mbajt në lidhje me kërkesën e Prokurorisë që të dyve t’iu caktohet masa e paraburgimit. Por mbrojtja e tyre ka kundërshtuar masën e paraburgimit.
Arben Geci, avokati i të dyshuarit A.K., ka thënë se ka kundërshtuar kërkesën e Prokurorisë për caktimin e masës së paraburgimit për klientin e tij.
“Prokurori ka kërkuar masën e paraburgimit, ne e kemi kundërshtuar për arsye se nuk janë plotësuar kushtet sipas nenin 106, paragrafi 2. Kështu që tash pritet të vendosë gjyqtari nëse do të caktojë masën e paraburgimit apo rasti do të shkojë në procedurë të rregullt”, tha Geci.
Ndërkaq, Hamdi Podvorica, avokati i të dyshuarit S.M., ka konfirmuar se klienti i tij akuzohet për falsifikim të rezultateve të votimit dhe dhënies-marrjes së ryshfetit, por ata janë duke pritur vendimin e Gjykatës.
“Ajo që mund të them tani për tani është se ata akuzohen për falsifikim të rezultateve të votimit dhe dhënies-marrjes së ryshfetit, por presim vendimin e Gjykatës. Mbrojtja e ka kundërshtuar pretendimin se ata kanë kryer vepër penale, por kjo do të vërtetohet në zhvillimet e mëtejme të procedurës”, theksoi Podvorica.
-
11 mars 2021 19:45
-
Shpërndaje në: