Arbëri

Vonohen disa pako me vota nga diaspora, KQZ-ja s’i merr parasysh

Rreth 60 pako me fletëvotime nga diaspora pritet të mbërrijnë këtë të shtunë në Kosovë. Të njëjtat nuk do të merren parasysh nga Komisioni Qendror i Zgjedhjeve, shkaku i ardhjes jashtë afatit të përcaktuar me ligj.

Afati për ardhjen e pakove nga diaspora ka përfunduar të premten, më 12 shkurt.

KOHA, jozyrtarisht, ka marrë vesh që arsyeja e vonesës së këtyre pakove është mosrealizimi i fluturimeve të planifikuara, shkaku i motit të lig.

Nga Komisioni Qendror i Zgjedhjeve nuk kanë dhënë detaje lidhur me pakot e ardhura me vonesë, derisa kanë bërë të ditur se brenda afatit ligjor kanë pranuar 43 mijë e 477 pako të supozuara me fletëvotime.

Lidhur me këto pako, KOHA ka provuar të kontaktojë edhe me Sekretariatin e KQZ-së, që bën bartjen dhe pranimin e tyre, por zyrtarë të saj kanë qenë të paqasshëm gjatë së shtunës.

Në anën tjetër, Komisioni Qendror i Zgjedhjeve ka shpërndarë materialin e ndjeshëm nëpër komuna.

Shpërndarja e tyre është bërë nën përcjellën e njësiteve policore.

“Ky material, siç e shihni, po shpërndahet nën përcjelljen e Policisë së Kosovës dhe i njëjti do të dërgohet në depot e Komisioneve Komunale të zgjedhjeve në të 38-të komunat e Kosovës, ndërkaq nesër në orët e hershme të mëngjesit do të shpërndahet në qendrat e votimit në mënyrë që në orën 7:00 të mund të fillojë procesi i votimit”, ka thënë Valmir Elezi, zëdhënës i KQZ-së.

Elezi ka bërë të ditur se janë shtypur 10 për qind më pak fletëvotime sesa është numri i votuesve me të drejtë vote, veprim ky i përvitshëm i KQZ-së.

Nga qendra ku janë grumbulluar, në objektin e Ministrisë së Infrastrukturës, pakot e ardhura nga diaspora të dielën do të barten për në Qendrën e Numërimit dhe Rezultateve, ku fillimisht do të verifikohen e pastaj edhe do të bëhet numërimi i tyre.