Arbëri

ATK-ja njofton tatimpaguesit: Paguani tatimin bazë e interesin, përfitoni nga shlyerja e ndëshkimeve

Agjencia Tatimore e Kosovës ka dal me një njoftim për tatimpaguesit. ATK-ja ka thënë se tatimpaguesit në rast se paguajnë tatimin bazë dhe interesin, atëherë do të përfitojnë nga shlyerja e dënimeve.

Nga kjo mund të përfitojnë vetëm ata që kryejnë detyrimet deri më 30 qershor të këtij viti.

“Me qëllim të zbatimit të Vendimit Nr. 04/60 të Qeverisë së Republikës së Kosovës, datë 27.01.2021, për lehtësimin e ushtrimit të aktivitetit ekonomik të të gjithë tatimpaguesve, si pasojë e gjendjes së vështirësuar ekonomike të krijuar nga pandemia COVID-19, Administrata Tatimore e Kosovës, ju njofton se hiqen ndëshkimet për të gjithë tatimpaguesit të cilët kryejnë pagesën e plotë të tatimit bazë (kryegjësë) dhe interesit. Të gjithë personat fizikë dhe juridikë, të cilët kanë obligime tatimore të papaguara ndaj ATK-së, për të gjitha periudhat dhe llojet e tatimeve/kontributeve, mund të përfitojnë nga falja e ndëshkimeve, me kusht që të njëjtit, të kryejnë pagesën e plotë të tatimit bazë (kryegjësë) dhe interesit deri më 30 qershor 2021. Pra, heqja e ndëshkimeve bëhet për të gjithë tatimpaguesit, nëse: Tatimpaguesit bëjnë pagesën e njëhershme të tatimit bazë (kryegjësë) dhe interesit; Tatimpaguesit bëjnë marrëveshje me ATK-në për pagesë me këste; Tatimpaguesit janë në marrëveshje me ATK-në dhe paguajnë tatimin bazë (kryegjënë) dhe interesin. Vetëm tatimpaguesit të cilët shfrytëzojnë këtë mundësi dhe përmbushin detyrimin e kërkuar brenda periudhës ligjore deri me 30 qershor 2021, do të përfitojnë nga falja e ndëshkimeve. Heqja e ndëshkimeve për tatimpaguesit të cilët paguajnë tatimin bazë (kryegjënë) dhe interesin, për të gjitha periudhat dhe llojet e tatimeve/kontributeve, do të bëhet në mënyrë automatike nga ATK, pra tatimpaguesi nuk obligohet të aplikoj për heqje të ndëshkimeve”, thuhet në njoftim të ATK-së.