Arbëri

Nagavci: Uniteti rreth klubit të stërvjetëruar politik do të ishte gabim, Kosovës i duhen zgjedhjet

Nënkryetarja e Kuvendit të Kosovës, Arbërie Nagavci, thotë se në Kosovë vazhdimisht ka pasur unitet për shumë çështje, porse ky unitet duhet të ketë legjitimitet. Përmes një shkrimi në Facebook, Nagavci ka kërkuar që vendi të shkojë në zgjedhje.

Sipas saj, uniteti nuk mund të jetë qëllim në vete, por duhet t’i shërbejë një qëllimi. Këtu ka shtuar se uniteti rreth, siç shprehet ajo “klubit të stërvjetëruar politik”, do të ishte gabim tjetër.

“Nuk mund të ketë unitet pa legjitimitet. Kurdo që lindë nevoja, thirrjet për unitet duhet të kenë qëllim dhe bosht. Pra për çka po bashkohemi dhe rreth kujt? Këto dy pyetje janë tepër të rëndësishme, sepse unitet ne kemi pasë edhe për çështje që në fund rezultuan të dëmshme për vendin”, thotë Nagavci.

Nagavci, më tutje ka kujtuar se në çfarë çështjesh ka pasur unitet në Kosovë.

“Unitet ka pasë edhe për marrëveshjen me Serbinë në vitin 2013, rreth atëherë Hashim Thaçit kryeministër. Unitet ka pasë edhe rreth formimit të Gjykatës Speciale në vitin 2015, përsëri rreth Hashim Thaçit kryeministër. Unitet ka pasë edhe për demarkacionin me Malin e Zi në vitin 2017, rreth atëherë Ramush Haradinajt kryeministër e PAN-it koalicion qeverisës. Unitet ka pasë edhe për rrëzimin e Qeverise Kurti me 82 vota në mes të pandemisë këtë vit, rreth Hashim Thaçit president e Isa Mustafës lider të klubit të stërvjetëruar politik”, shkruan tutje Nagavci në Facebook.

Sipas Nagavcit, uniteti nuk mund të jetë qëllim në vetvete.

“Ai duhet të jetë instrument në shërbim të një qëllimi. Nuk mund të këtë unitet rreth atyre që nuk kanë legjitimitet, e aq më pak rreth atyre që janë përgjegjës dhe shkaktarë për situatën sot. Janë bërë shumë gabime në të kaluarën në Kosovë e në dëm të saj nga ata që ishin dje e që vazhdojnë të jenë sot. Uniteti rreth klubit të stërvjetëruar politik do të ishte një tjetër gabim”, thotë nënkryetarja e Kuvendit të Kosovës.

Nagavci, nga radhët e Lëvizjes vetëvendosje, thotë gjithashtu se vendit i duhen zgjedhjet të reja sa më parë që mundësojnë krijimin e një boshti legjitim e të duhur për unitet.