Numri i madh i pacientëve, të cilët kanë nevojë të trajtohen me oksigjenoterapi ka shtuar kërkesat për furnizim me bombola oksigjeni në klinikat e QKUK-së dhe spitalet rajonale.

Së fundi, QKUK-ja po planifikon të blejë bombola 1000 të oksigjenit për t’i shpërndarë nëpër klinikat e saj. Por, QKUK-ja ka vendosur që t’i largojë kriteret që bombolat e oksigjenit të cilat planifikohen të përdoren për t’i trajtuar pacientët me COVID-19 të jenë të importuara nga kompani të regjistruara nga Agjencia për Produkte dhe Pajisje Mjekësore, raporton KOHA.

Në tenderin e hapur më 11 të këtij muaji, ishte vendosur që furnizuesi të ketë licencë valide si qarkullues me shumicë për produkte dhe pajisje mjekësore.

Por, më pas Zyra e Prokurimit ka vendosur ta heqë këtë kriter. QKUK-ja në një përgjigje me shkrim është arsyetuar se kriteri që furnizuesi të ketë licencë valide nga Agjencia për Pajisje dhe Produkte Mjekësore është hequr pasi që bëhet fjalë vetëm për bombola të pambushura.

Sipas QKUK-së, vetëm në rastet kur kërkohet furnizimi me oksigjen kërkohet kriteri për licencë valide nga AKPPM-ja.

“Qendra Klinike Universitare e Kosovës ka hapur tender për njëmijë bombola të oksigjenit. Me datë 11.08.2020 është bërë publikimi, ndërsa shpallja me datë 27.08.2020. Këtu kemi të bëjmë me bombola (të pambushura), e jo me oksigjen. Ndërsa, vetëm për oksigjen kërkohet kriteri për licencën valide nga AKPM-ja, si qarkullues me shumicë e pakicë?”.

Më tutje, QKUK-ja njoftoi se furnizimi me bombola të oksigjenit vjen pas kërkesave dhe nevojave të spitaleve rajonale dhe klinikave të QKUK-së.

“Po kjo ka ardhur sipas kërkesave dhe nevojave të spitaleve rajonale dhe klinikave të QKUK-së”.

KTV-ja ka pyetur Agjencinë e Pajisjeve dhe Produkteve Mjekësore nëse është e lejuar që institucionet publike të furnizohen me bombola nga qarkullues të cilët nuk janë të licencuar nga kjo agjenci, por AKPPM-ja përmes një përgjigje me shkrim ka thënë se nuk është kompetente që të flasë për kriteret e prokurimit në këtë rast.

“AKPPM si agjenci ekzekutive(e jo rregullatore) e përcaktuar me ligj nuk është kompetente që të përgjigjet në pyetjet që kanë të bëjnë me kriteret e prokurimit në këtë rast apo t’ju japë rekomandime institucioneve të tjera të MSH-së lidhur me to”, thuhet në përgjigjen e Agjencisë Kosovare për Pajisje dhe Produkte Mjekësore .

Ndërsa, kompania “Medical Group” e cila është njëra prej kompanive e cila aktualisht ka kontratë për furnizim me oksigjen ka vënë në dyshim nëse kjo kompani në të ardhmen mund t’i mbush këto bombola.

Kjo kompani përmes një përgjigje me shkrim njoftoi se certifikatat duhet të jenë të pranuara nga kompania që kryen mbushjen, derisa shton se ky tender është dashur të ju ofrohet kompanive që kanë oksigjenin mjekësor të licencuar dhe ajo që e fiton tenderin ta bëjë edhe mbushjen e parë.

“Bombola për tu mbushur duhet t’i plotësoj kriteret e sigurisë të cilat dëshmohen me certifikatën e A-testit nën presion me numër serik të bombolave përkatëse, si dhe kualitetin e garantuar të materialeve dhe dizajnit i siguruar përmes certifikimit ISO dhe CE. Bombola duhet të jetë e ngjyrosur me ngjyrë të bardhë, ngjyra e cila i determinon bombolat për Oksigjen Mjekësor dhe të jetë e pajisur me valvulen residuale apo standarde chrom-chobalt ngjyrë argjendi e cila është specifike për oksigjen mjekësor! Gjithashtu certifikatat duhet të jenë të pranuara nga kompania që kryen mbushjen , në rastin tonë partneri ynë Sol S.p.a. Kjo metodë nuk është aspak e nevojshme pasi i njëjti tender ka mundur të ju ofrohet kompanive që kanë oksigjenin mjekësor të licencuar, dhe ajo që e fiton ta bëjë edhe mbushjen e parë! Mirëpo kjo nuk është siguruar dhe besoj se në fund këto bombola do na mbeten në përgjegjësi për ti mbushur pasi SHSKUK nuk ka opsion tjetër, andaj edhe ne kemi insistuar që kriteri i certifikimit të pranuar nga furnitori të jetë pjesë e kritereve gjë e cila në dosjen e tenderit nuk është e kjartë! Gjithashtu nisur nga fakti se duhet të bëhet eksporti i përkohshëm për mbushje kjo, certifikata me numra serik është e domosdoshme”, thuhet në përgjigjen e tyre.

Derisa Ligji Pajisje dhe Produkte Mjekësore sqaron kushtet që duhet të ofrojnë ata qarkullues që janë të licencuar. Neni 12 i këtij ligji parasheh që poseduesi i licencës së qarkullimit farmaceutik me shumicë duhet të sigurojë prova të përmbushjes së standardeve të praktikës së mirë të shpërndarjes të pranuara ndërkombëtarësh.

Derisa udhëzimi administrativ mbi kërkesat e praktikës së mirë të prodhimit për produktet mjekësore thotë se ‘pjesë individuale të prodhimit të produkteve mjekësore përfshijnë të gjitha operacionet nga furnizimi me materiale dhe produkte, prodhimit adekuat të produktit mjekësor, paketimet imediate, paketimit të jashtë kontrollit të kualitetit etj.”.

Deri më tani në dy raste të ndara dy bombola të oksigjenit kanë shpërthyer.

Një ditë më parë, në Spitalin e Ferizajt shpërtheu rregullatori i një bombole duke i shkaktuar lëndime të lehta një personi.

Ndërsa ditë më parë një bombole tjetër kishte shpërthyer në Klinikën e Pulmologjisë, e cila i shkaktoi djegie të duarve një pacienteje aty.