Të enjten e 13 gushtit kur bëhen 19 vite nga Marrëveshja e Ohrit, kryetari i Bashkimit Demokratik për Integrim, Ali Ahmeti, ka ftuar në një takim drejtuesit e partive politike parlamentare shqiptare të Maqedonisë së Veriut.

Në këtë tryezë të partive parlamentare shqiptare janë ftuar Afrim Gashi nga Alternativa, Bilall Kasami nga Besa, Ziadin Sela nga Aleanca për shqiptarët dhe Menduh Thaçi nga Partia Demokratike Shqiptare.

Pas zgjedhjeve të parakohshme parlamentare të 15 korrikut, partitë shqiptare në Maqedoninë e Veriut janë bërë faktor për ngritjen e qeverisë së re për shkak të numrit të ulëseve që kanë fituar.

BDI-ja, përmes një njoftimi për media, tha se ftesa për këtë takim të gjithë liderëve të partive politike shqiptare iu është dërguar të premten, ndërsa ende po presin përgjigje.