Arbëri

Rinis gjykimi për të akuzuarin për krime lufte, Tasiqi thotë se ndihet i pafajshëm

Pas gati më shumë se tre muaj, i akuzuari për krime lufte në Krushë të Vogël, Darko Tasiq, ka dalë sërish para Gjykatës Themelore në Prizren.

Procesi gjyqësor ndaj tij i ishte afruar fundit, por pandemia COVID-19 ndikoi edhe në punën e gjyqësorit, duke pamundësuar mbajtjen e seancave.

Tasiqi ka thënë se nuk ndihet fajtor për pikat e aktakuzës, dhe ka deklaruar se do të mbrohet në heshtje.

Prokurorja e rastit, Drita Hajdari, tha se në bazë të provave që i ka siguruar Prokuroria, vërtetohet se Tasiqi ka kryer veprat penale për të cilat akuzohet.

Por mbrojtja e tij ka thënë se provat e paraqitura nuk e vërtetojnë fajësinë e të akuzuarit.

Megjithatë, avokati Lubomir Pantoviq dhe Prokuroria u pajtuan që nuk është e arsyeshme që të dëgjohen të gjithë dëshmitarët.

“Mendoj se nuk është e nevojshme që të ftohen dëshmitarët, si dhe të mos administrohen provat se tashmë janë administruar, pasi Darko Tasiq më shumë se dy vjet e gjysmë ndodhet në paraburgim dhe dëgjimi i sërishëm i të gjithë dëshmitarëve në mënyrë të paarsyeshme do ta vazhdojë paraburgimin; në rast se do të veprohet ndryshe, ne do të kërkojmë ndërprerjen e paraburgimit”, ka thënë ai.

Propozimi i palëve u aprovua dhe në këtë seancë u lexuan provat materiale dhe deklaratat e dëshmitarëve.

Darko Tasiq akuzohet nga Prokuroria Speciale e Kosovës se gjatë muajit mars 1999 ka kryer krime lufte në Krushë të Vogël si pjesëtar i forcave rezervë të policisë jugosllave.

Ndërkohë, një gjykim për krime lufte ndaj Zoran Vukotiqit ka nisur këtë të hënë në Gjykatën Themelore në Prishtinë.

Ai akuzohet nga Prokuroria Speciale e Kosovës për krime lufte ndaj popullatës civile në Komunën e Vushtrrisë dhe për dhunim seksual ndaj një gruaje shqiptare.

Vukotiqi, i cili aktualisht vuan dënimin në Burgun e Sigurisë së Lartë, pasi ishte dënuar me 6 vjet burgim në vitin 2018 për tortura ndaj të burgosurve në Burgun e Smrekonicës gjatë vitit 1999, në seancën fillestare e ka mohuar fajësinë.