Arbëri

Lirohet pacienti “zero” me koronavirus në Kosovë, 3 të infektuar në gjendje të rëndë

Ushtruesja e detyrës së drejtoreshës së Klinikës Infektive, Lindita Ajazaj- Berisha dhe prof.Sali Ahmeti, në një konferencë për media njoftuan për gjendjen e të infektuarve me Covid-19 në Kosovë.

Ajazaj-Berisha tha se janë 40 të hospitalizuar në Infektivë.

“40 janë në gjendje stabile. 7 në oksigjenoterapi dhe 2 me ventilim mekanik”, tha ajo, raporton KOHA.

Ajo njoftoi se dje rreth orës 19:40, ka vdekur edhe një pacient i cili përveç me COVID-19 ka pasur edhe sëmundje tjera. Kjo dje çoi në 5 numrin e të vdekurve.

Ndërsa profesori Sali Ahmeti, tha se sot do të lirohet edhe pacienti i parë “Zero”, që është 77 vjeçari.

“Gjendja shëndetësore e pacientëve të hospitalizuar është kjo: 9 janë në gjendje më të rëndë, por në veçanti 3 prej tyre. 2 janë në ventilim mekanik. Ne po bëjmë të pamundurën t’u përmirësohet gjendja. Krahas kësaj, kemi lajme të mira. Sot lirohet rasti zero, një 77 vjeçar i cili ka pasur edhe sëmundje kronike, ai ka pasur edhe infeksion të rëndë me Covid19”, përfundoi Ahmeti.

Gjithashtu u bë e ditur se 5 infermiere janë të infektuara me Covid-19. 3 prej tyre janë të hospitalizuara, por sipas Ajazaj-Berishës, janë në gjendje të mirë shëndetësore.