Arbëri

Policia e Kosovës kërkon mbylljen e restoranteve në veri

Foto: Koha / ilustrim

Policia e Kosovës, në koordinim me punonjësit e inspektimit komunal, vizitoi të shtunën kafiteritë dhe restorantet në Mitrovicën e Veriut, Zveçan dhe gjithë pjesën veriore të Kosovës dhe kërkoi nga pronarët që të ndërpresin punën, në përputhje me urdhrin e Qeverisë së Kosovës për mbrojtje nga koronavirusi.

Zëvendësdrejtori i policisë për rajonin e veriut, Besim Hoti, e konfirmoi këtë për Radion Evropa e Lirë, duke thënë se paralajmërimi u është shpërndarë të gjithë pronarëve të objekteve ku mund të mblidhen njerëz.

“Pronarët e kuptuan këtë plotësisht dhe nuk kishte asnjë keqkuptim”, tha Hoti.

Ai shtoi se vetëdijesimi i vetë qytetarëve për t’i shmangur kontaktet me shumë njerëz është po ashtu i rëndësishëm.

Qeveria e Kosovës miratoi një sërë masash preventive të premten, pas regjistrimit të rasteve të para me koronavirus në Kosovë.