Arbëri

Edhe sot u raportuan 3 raste të dyshuara me koronavirus në Kosovë, të gjitha rezultuan negative

Foto: Koha

Instituti Kombëtar i Shëndetësisë Publike të Kosovës (IKSHPK), edhe një herë ritheksoi sonte se në Kosovë nuk ka koronavirus.

Megjithatë, ka bërë të ditur se gjatë ditës së sotme ka marrë informatë nga Klinika Infektive e QKUK-së për 3 raste të dyshimta me COVID-19.

Siç njofton IKSHPK, në Laboratorin e Mikrobiologjisë Molekulare në IKSHPK janë testuar 3 mostra të pacientëve në virusin SARS CoV-2 dhe kanë rezultuar negative.

“Nga data 08.02 deri më 29.02.2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 33 mostra të dyshimta në virusin SARS-CoV-2 dhe të gjitha kanë rezultuar negative. Instituti Kombëtar i Shëndetësisë Publike të Kosovës (IKSHPK) gjatë ditës së sotme me 29 shkurt 2020, ka marrë informatë nga Klinika Infektive e QKUK për 3 raste të dyshimta në COVID-19”, thuhet në njoftimin e IKSHPK-së.

LEXO EDHE: IKSHPK: Në Kosovë nuk ka koronavirus, mos udhëtoni drejt Kinës e vendeve tjera ku është përhapur

Pacientët u kontrolluan nga ekipi i infektologëve në Klinikën Infektive në QK UK dhe iu morën mostrat për testim laboratorik në virusin SARS-CoV-2.

“Me datë 29.02.2020, në Laboratorin e Mikrobiologjisë Molekulare në IKSHPK janë testuar 3 mostra të pacientëve në virusin SARS CoV-2 dhe kanë rezultuar negative. Nga data 01.02.2020 deri me 29.02.2020 nga aeroporti ndërkombëtar “Adem Jashari” si dhe pikat tokësore kufitare janë depistuar gjithsej 924 udhëtarë. Nga Aeroporti “Adem Jashari” 172 udhëtarë, Vërmicë 351, Merdare 346, Hani i Elezit 22, Dheu i bardhë 26 dhe Kullë 7 udhëtarë”, përfundon raporti.