Emini: Fakti që VV e LDK s’merren vesh për një pozitë tregon që nuk e kanë seriozisht çkapjen e shtetit

03 December 2019 20:18
21:12

Donika Emini, drejtoreshë në CiviKos, në Rubikon të KTV-së ka thënë se fakti që Vetëvendosje e LDK-ja nuk merren vesh për një pozitë do të thotë se ato nuk e kanë seriozisht çkapjen e shtetit.

“Fakti që ata nuk po munden me arritë një marrëveshje dhe për shkak të egos së tyre, të dy partive, e kemi një qeveri në detyrë që vazhdimisht po merr vendime të dëmshme për Kosovën, kjo tregon që këto dy parti nuk e kanë qëllimin e tyre për me e çkapë shtetin. Fakti që po kapen për një pozitë tregon që nuk e kanë seriozisht çkapjen e shtetit", ka thënë Emini.

21:01

Velija: Për pozitën e presidentit VV e LDK duhet të kenë marrëveshje mirëbesimi, jo kalkulim brenda ministrive

Opinionisti Dardan Velija në Rubikon të KTV-së ka thënë se për pozitën e presidentit duhet të ketë një marrëveshje mirëbesimi, e kjo nuk duhet të përfshihet brenda diskutimeve për ministritë.

"Për pozitën e presidentit pajtohem që do të duhej të ishte një marrëveshje mirëbesimi mes dy partive dhe jo kalkulim brenda ministrive që zgjidhen tash si rezultat i procesit zgjedhor të tanishëm", ka thënë Velija, që ka shtuar se presidenti vjen pas një viti e gjysmë.

Ai thotë se këto dy parti kanë proklamuar se synohet një koalicion afatgjatë.

"E kemi dëgjuar para zgjedhjeve se ky koalicion është proklamuar si koalicion për 8 vjet dhe jo 4 dhe në qoftë se vërtetë synojnë të ketë një bashkëpunim më afatgjatë, dhe përderisa nuk e kemi një ndryshim transformativ të sistemit zgjedhor, ne duhet të vazhdojmë të kemi shumë parti, ne nuk mund të kalojmë në sistemin me dy parti", ka thënë ai.

20:54

Qorrolli: Nëse LDK-ja e kushtëzon pozitën e presidentit është gabim

Vigan Qorrolli, profesor i së drejtës ndërkombëtare, në Rubikon të KTV-së ka thënë se do të ishte gabim që LDK-ja të kushtëzojë pozitën e presidentit.

“Nëse LDK-ja e kushtëzon pozitën e presidentit atëherë besoj se po bën një gabim goxha patologjik sepse nuk po e materializojnë vullnetin e zgjedhësve që mos ta bartin pasojën e bërjes së Thaçit president dhe mos ta riparojnë, nëse është tendencë që ta riparojnë dëmin që e kanë bërë sepse atyre ju ka hakmarrë. Çdo herë kur është përmendur LDK, prej kundërshtarëve të saj, qofshin politikë, qofshin mediatikë, sepse ka qenë hisedare në kapje të shtetit dhe bërjen e Thaçit president".

Tutje ai ka shtuar se, “tash Vetëvendosja, besoj që Kurti nuk do të duhej të lëshonte pe por të parashihte që kur të vjen koha të bëhet".

20:34

Paçarizi: Kurti është dashur të shkojë te varri i Rugovës, si shenjë respekti për partneritetin me LDK-në

Objektivi i vetëm i cili i bashkon LDK-në e VV-në, tha Rrahman Paçarizi, është çuarja e PDK-së në opozitë, për që sipas tij është e pamjaftueshme.

"Nuk është kjo kauzë e mjaftueshme", tha ai.

Paçarizi tha se në fillim të krijimit të grupeve punuese mes dy partive u pa me shumë optimizëm mirëpo u zhgënjye nga mungesa e transparencës nga këto takime.

"Takimet e grupeve punuese për të cilat kam qenë shumë optimist mungesë e skajshme e transparencës, kurrkush nga publiku nuk e dinë se çka është diskutuar në ato takime, madje ka pasur edhe skenare të frikshme", ka thënë Paçarizi.

Sipas tij Kurti është dashur të flasë për figurën e Kurtit.

"E di që ma kanë pa për të madhe mirëpo Kurti është dashtë ta thotë një fjalë për figurën e Ibrahim Rugovës, nëse për asgjë, për respektin e partnerit të koalicionit dhe LDK është e ndjeshme ndaj figurës së Rugovës", u shpreh ai.

Sipas tij çështja e pozitës së presidentit duhet të rrjedhë natyrshëm gjatë bashkëpunimit qeverisës ndërmjet Vetëvendosjes dhe LDK-së.

"Edhe nxjerrja e pozitës së presidentit mendoj që është një pengesë për koalicionin dhe e prish shijen e një koalicioni siç e kemi parë parimor sepse nxjerrja e pozitës së presidentit në pazar mes këtyre dy partive që duan të funksionojnë ndryshe prej partive tjera është një hap jo i mirë. Mendoj që çështja e presidentit është dashtë me dalë vetë, me lulëzuar, si rezultat i bashkëpunimit të këtyre dy partive", ka thënë Paçarizi.

20:18

Emini: Problemi më i madh për marrëveshjen VV-LDK do të jetë MPB

Donika Emini, drejtoreshë në CiviKos, në Rubikon të KTV-së ka thënë se çështja e Ministrisë së Punëve të Brendshme do të jetë problemi më i madh për marrëveshjen ndërmjet Vetëvendosjes dhe LDK-së për formimin e koalicionit qeverisës.

Sipas saj këto dy parti ideologjikisht janë të ndryshme.

"Kjo ka qenë veç eufori. Është mirë që është diskutuar për objektiva mirëpo unë e kam parë problem se këto dy parti ideologjikisht janë shumë të ndryshme, gjatë kampanjës zgjedhore ka pasur tendenca që të jenë më të ngjashme mirëpo shembull në dialogun nuk ka pasur dakordim", ka thënë Emini.

Sipas saj, duhet të kihet parasysh se VV dhe LDK, ndonëse me një deputet diferencë, pothuajse janë të njëjta.

Emini tha se përveç objektivave, dihet se LDK i takon një mendësie e cila tradicionalisht ka pasur synimin te ndarja e posteve.

"Duhet me marrë parasysh që janë pothuajse të njëjtë, normalisht VV është fituese mirëpo e ka vetëm një deputet më shumë", ka thënë Emini. "Kur flitet për dy parti që po donë me çkapë shtetin, prapë po flitet për pozita, për lakminë që partia e tyre me marrë poste më shumë. Mendoj që Ministria e Punëve të Brendshme ka me qenë problemi më i madh".

Sipas saj tashmë Vetëvendosje e ka diskutuar emrin për Ministrinë e Brendshme.

"Deri aty ka shkuar ambicia sa VV e ka diskutuar edhe emrin se kë duan ta bëjnë ministër të Punëve të Brendshme".

Image

© KOHA. Të gjitha të drejtat janë të rezervuara.

Komentet

Shto koment

Të ngjashme