Me një muaj vonesë, për shkak të zgjatjes së procedurës së konfirmimit në Parlamentin Evropian, të dielën ka marrë mandatin pesëvjeçar Komisioni i ri i BE-së në krye me ish-ministren e Mbrojtjes të Gjermanisë, Ursula von der Leyen.

Do të jetë hera e parë në histori që Komisionin Evropian e drejton një grua, ndërkohë që në ekipin e saj ka një balancë të mirë të gjinive, sepse një numër rekord grash janë edhe komisare në ekipin prej 27-anëtarësh, shkruan sot “Koha Ditore”.

Për herë të parë numri i komisarëve është më i vogël, sesa numri aktual i shteteve anëtare, por kjo për shkak se Britania e Madhe, duke llogaritur se pas dy muajsh nuk do të jetë më anëtare formale e BE-së, ka refuzuar që ta dërgojë përfaqësuesin e saj në kolegjin e komisarëve.

Të njëjtën ditë ka ndodhur edhe ndryshimi në krye të Këshillit Evropian, ku Donald Tusk nga Polonia ia ka dorëzuar mandatin ish-kryeministrit të Belgjikës, Charles Michel.

(Artikullin e plotë mund ta lexoni sot në “Koha Ditore)