Arbëri

Instituti EduMedia e sheh të domosdoshme përfshirjen e Edukimit Medial në plan-programin shkollor

Foto: Driton Paçarada / Koha

Instituti EduMedia në fillimin e vitit të ri shkollor ka ritheksuar nevojën për përfshirjen e lëndës për Edukim Medial në plan-programet e arsimimit të mesëm të ulët.

Përmes një komunikate për media, ky institut thotë se është nevojë urgjente përfshirja e kësaj lënde në plan-programet shkollore, për shkak të ekspozimit enorm të fëmijëve ndaj rreziqeve të ndryshme nga përmbajtjet e papërshtatshme dhe të rrezikshme në medie.

“Tash e disa muaj, ligjërues të Departamentit të Gazetarisë të Universitetit të Prishtinës në bashkëpunim me SBASHK-un po mbajnë trajnime të mësimdhënësve për edukim medial ndërkohë Instituti EduMedia potencon nevojën që të ndërmerren hapat për ta përfshirë edukimin medial si lëndë obligative në arsimin formal”, thuhet një njoftim për media.

Sipas tyre, për të mbrojtur fëmijët, nga dezinformatat, nga dhuna e shfaqur në medie apo çfarëdo përmbajtje tjetër mediale negative, ata duhet të aftësohen që të kenë gjykim kritik dhe aftësi për t’u shmangur nga rreziqet.

“Përfundimisht, konsiderojmë që ky vit shkollor duhet të shfrytëzohet për të marrë vendimin e shumëkërkuar dhe të shumë nevojshëm, për futjen e lëndës së Edukimit Medial në plan-programet obligative shkollore”, thuhet tutje në kumtesë.

Gjatë këtij viti, Departamenti i Gazetarisë i Universitetit të Prishtinës në bashkëpunim me SBASHK-un ka filluar mbajtjen e trajnimeve të mësimdhënësve për edukim media, por ata theksojnë se, kjo iniciativë e edukimit joformal, duhet të plotësohet me projekte të tjera, veçmas në arsimin formal.