Arbëri

Reqica: Numri i vdekjeve në vendin e punës ka rënë, do të rekrutojmë 20 inspektorë të rinj

Ministri i Punës dhe Mirëqenies Sociale, Skënder Reqica, duke folur për pensionet e dyfishta, ka thënë se kjo është dukuri që është përcjellë nga e kaluara.

Ai në emisionin “Puls” të KTV-së thotë se Ligji për Financimin e Pensioneve tregon se asnjë qytetarë nuk guxon të marrë dy pensione.

Sipas tij vetëm një kategori e caktuar merr pensione të dyfishta, derisa sqaron se është ajo e TMK-së dhe FSK-së. Ai ka thënë se po presin interpretim të ligjit për të trajtuar tutje këtë temë.

Reqica ka thënë se janë duke bërë hulumtim të rreptë sa i përket skemave pensionale.

“Kanë qenë 26 mijë familje që e kanë marrë asistencën sociale kur unë kam marrë mandatin, tashmë janë 25 mijë ku përmes hulumtimeve kemi hasur në familje që nuk kanë pasur nevojë për të, të tjera kanë qenë të cilat janë angazhuar në tregun e punës”, ka shtuar ai.

Ndërkaq për pushimin e lehonisë ai thotë se vitin e kaluar është hartuar koncept-dokumenti ku janë nxjerr dy ligje, siç është edhe Ligji i Punës.

Ai thotë se në kuadër të Ligjit të Punës, janë trajtuar edhe lehonat që nuk janë në marrëdhënie pune, të cilat do të marrin një pagë për gjashtë muaj.

Reqica ka folur edhe për çështjen e papunësisë deri sa thotë se për gjatë vitit 2018 janë trajtuar mbi 22 mijë punëkërkues të regjistruar.

“Vetëm brenda këtij viti kemi mbi 8 mijë punëkërkues të trajtuar”, thotë ai.

Ai tutje ka shtuar vetëm gjatë vitit të kaluar ka pasur 22 aksidente me fatalitet në vendin e punës. Ai thotë se nga janari janë 7 raste me fatalitet.

“Ne do të jemi pa kompromis ndaj të gjithë punëdhënësve dhe punëmarrësve. Inspektorati punës është në vazhdimësi në terren dhe po i mbikëqyrë. Rezultatet flasin se kemi rënie të dukshme të lëndimeve në vendin e punës”, ka shtuar ai.

Ai thotë se kanë në procedurë të rekrutimit 20 inspektorë të rinj.

Ndërkaq për shpërndarjen e pensioneve bazë, ai ka thënë se në të ardhmen do të shikohet mundësia që pensionet të shpërndahen në forma tjera dhe jo të pritet para bankave.

Reqica tutje ka shtuar se ka ankesa në Inspektoratin e Punës për mosrespektimin e të drejtave të punës.

Ai thotë se ankesat trajtohen në vazhdimësi dhe në kohë reale.

Ai tutje ka folur edhe për trajtimin e kërkesave për statusin e viktimës së dhunës seksuale gjatë luftës së fundit në Kosovë.

Ai ka thënë se mbi 1000 aplikacione janë dorëzuar ndërkaq mbi 100 aplikacione janë refuzuar.

Ndërkaq punën e ngadalshme të Komisionit, Reqica e ka arsyetuar duke thënë se ka aplikacione të cilat trajtohen disa herë.

Reqica ka thënë se Ministria po përpiqet për ndërtimin e qendrave për banim social.

Ai ka thënë se ka filluar ndërtimi i qendrave sociale derisa shton se personat të cilët do të vendosën do të klasifikohen në bazë të nevojave.

Ai tutje ka shtuar se vendit i duhet që sa më parë te realizohet reforma pensionale dhe asistenca sociale.