Arbëri

Pos infermierëve, për Gjermani përgatiten edhe përpunuesit e metalit dhe drurit

Kryeministri i Kosovës, Ramush Haradinaj, ka pritur sot në takim përfaqësues të sektorit të përpunimit të metalit dhe drurit, për t’i dëgjuar nga afër kërkesat e tyre, në mënyrë më specifike çështjen e inicimit të një marrëveshjeje bilaterale për transfer të fuqisë punëtore me Gjermaninë.

Përfaqësuesit e sektorit të përpunimit të metalit dhe drurit e kanë njoftuar kryeministrin Haradinaj për veprimtarinë e tyre dhe angazhimet që ka ky sektor, duke thënë se shumë kompani përpunuese të metalit në Kosovë eksportojnë në Gjermani, bazuar në marrëveshjet B2B që i kanë me kompanitë gjermane.

Lexo edhe: Zyrtarizohet marrëveshja që çon më shumë infermierë kosovarë në Gjermani

“Bizneset kosovare momentalisht kanë të hapura edhe përfaqësi në Gjermani, por kanë probleme me fuqinë punëtore që nuk mund ta transferojnë atje. Përfitimet janë të shumëfishta të kompanive kosovare, por edhe të Qeverisë së Kosovës nëse do të mund të lidhet kjo marrëveshje”, i thanë kryeministrit Haradinaj përfaqësuesit e sektorit të përpunimit të metalit dhe drurit në këtë takim.

Kryeministri Haradinaj u zotua se do të angazhohet që shqetësimet e tyre të marrin vëmendjen e merituar dhe se Qeveria do ta mbështesë Qendrën për Aftësim Profesional sipas modelit gjerman të mësimit dual.