Arbëri

KEK-u ka punësuar 106 persona për gjashtë muaj

Në Korporatën Energjetike të Kosovës nga janari i këtij viti janë angazhuar 106 punëtorë të rinj. Punësimi i tyre është bërë kryesisht në pozitat për prodhimin e energjisë dhe qymyrit. Profilet e të punësuarve janë inxhinierë e teknikë (të makinerisë, xehetarisë dhe elektroteknikës), si dhe manipulues të shiritave e operatorë, shkruan sot Koha Ditore.

Këto punësime kanë ngjallur reagime të shumta nga ana e banorëve të Obiliqit dhe të vetë kryetarit të kësaj komune, Xhafer Gashi. Jo se KEK-u vazhdon me punësime, por pse nuk u është dhënë përparësi banorëve të kësaj komune, përkatësisht pse nuk po respektohet Ligji për Obiliqin.

Në Korporatën Energjetike të Kosovës kanë thënë për gazetën se të gjitha punësimet janë bërë në bazë të ligjit.

Sipas drejtuesve të KEK-ut, 20 persona janë punësuar nga zona e Obiliqit pas plotësimit të kritereve të parapara në konkurs.Punësime në KEK kanë kërkuar edhe banorët e zonave të Hadës dhe të Shipitullës.

Në protestën e mbajtur ditë më parë, ata kanë thënë se duhet të respektohet vendimi i Qeverisë, i cili u jep përparësi pikërisht banorëve të këtyre lokaliteteve.

Por në KEK kanë sqaruar se Qeveria është njoftuar për kërkesën e 150 personave nga këto dy fshatra që kanë kërkuar punësim, si dhe për profilet e vendeve të lira të punës për dy vjetët e ardhshëm. (Artikullin e plotë mund ta lexoni sot në “Koha Ditore”)