Arbëri

Quinti i kthehet vërejtjeve për frikësime ndaj partive që garojnë kundër Listës Serbe në veri

Në një deklaratë të përbashkët, ambasadat e Francës, Gjermanisë, Italisë, Mbretërisë së Bashkuar dhe Shteteve të Bashkuara, thonë se kanë përcjell me vëmendje zgjedhjet e mbajtura me 19 maj 2019 në katër komunat në veri të Kosovës.

“Ne shohim se vetë dita e zgjedhjeve duket se ka kaluar në një atmosferë të qetë”, thuhet në deklaratë.

Por, vendet e Quintit i janë kthyer vërejtjeve të zgjedhjeve të vitit 2017, e të cilat sipas tyre nuk janë adresuar si duhet nga institucionet dhe aktorët relevantë.

“Sidoqoftë, ambasadat i rikujtojnë gjetjet e Misionit të BE-së për Vëzhgimin e Zgjedhjeve (EOM) të vitit 2017, që shprehën shqetësime serioze për frikësime në shumë zona të serbëve në Kosovë, sidomos kundër partive politike që garuan kundër Listës Srpska. Këto defekte, si dhe kërkesat për të përditësuar listat e votuesve dhe për të qartësuar procedurat, mbeten të paadresuara dhe kanë si rezultat konkurrencën dhe pjesëmarrjen e kufizuar politike, prandaj ngrenë pyetje lidhur me procesin e përgjithshëm demokratik në ato zona”, thuhet në reagim.

Quinti apelon te të gjithë akterët relevantë, përfshirë institucionet dhe partitë politike përgjatë gjithë spektrit, që të adresojnë urgjentisht këto defekte duke zbatuar rekomandimet e EOM-it.

“Inkurajojmë qytetarët dhe shoqërinë civile që t’i mbajnë partitë përgjegjëse për përkushtimin që partitë kanë shprehur përmes deklaratës së përbashkët në Kuvendin e Kosovës në prill të vitit 2019 për forcimin e procesit zgjedhor. Ata që janë zgjedhur tani duhet të angazhohen për të përfaqësuar interesat e gjitha bashkësive në komunat e tyre”, thuhet në fund të reagimit.