Kryeministri i Kosovës, Ramush Haradinaj nuk ka dashur të komentojë veprimin e djeshëm të deputet së PDK-së, Flora Brovina, e cila e bëri publike një fotografi ku shihej një grua duke u dhunuar seksualisht nga disa uahtarë, që më pas u komentua me shumë dyshime për vërtetësinë e saj.

Duke shprehur respektin për deputeten e PDK-së, Haradinaj shtoi se është në dijeni të kësaj fotografie, por që theksoi se në Kosovë ka ndodhur masakra e krime të shumta nga forcat serbe dhe pjesë e krimeve janë edhe dhunimet seksuale.

"Duhet me ditë që Flora është vetë viktimë, ajo ka qenë vetë e persekutuar dhe e keqtrajtuar , e burgosur edhe unë kam shumë respekt për të. Nuk mund ta komentoj këtë, nuk kam qenë në dijeni të kësaj fotoje dhe nuk di si me e komentua. Megjithatë nëse kalojmë prej kësaj pjesës së fotos për të cilën nuk di si ta komentoj është me rëndësi që të kthehemi dhe të qëndrojmë në atë që ne e dimë, në Kosovë kanë ndodhur masakra, ka viktima civile shumë, ka fëmijë të vrarë, pleq, ka viktima të dhunës seksuale, është e vërtet kjo", tha Haradinaj.

Kreu i ekzekutivit theksoi se Kosova me bazën e vetë kushtetuese dhe ligjore mund të themelojë gjykatë që dënon gjenocidin serb, por sipas tij sa pranohen kompetencat e saj është diçka tjetër.

"Kosova me bazën e vetë kushtetuese e ligjore mund të krijojë gjykatë edhe mund të krijojë dhoma të posaçme, pra është e drejtë e Kosovës ta bëjë. Unë mendoj se në rast të votimit të parlamentit ne mund ta bëjmë, sesa është kompetenca e kësaj dhe çfarë juridiskisoni i pranohet gjykatës tonë nga palët e tjera, ajo është diçka tjetër", tha Haradinaj.

Këto komente kryeministri Ramush Haradinaj i bëri nga Shqiponja (ish-Jabllanica) ku mori pjesë në manifestimin e përvjetorit të 20- të çlirimit të kësaj zone.

Kujtojmë që dje teksa po mbahej seanca për gjenocidin serb në Kosovë prej ku u nxor edhe një rezolutë, deputetja e PDK-së, Flora Brovina para mediave bëri publike një fotografi ku shihej një grua duke u dhunuar nga disa ushtarë, për të cilët ajo tha se ishin serbë dhe gruaja ishte nga Kosova. Nxjerrja e kësaj fotografie ngjalli reagime të shumta, ku më pas u vu në dilemë edhe vërtetësia e saj/KsP.