Kuvendi pritet të votojë Rezolutën për gjenocidin serb në Kosovë

Kuvendi në pauzë deri në orën 14

16 May 2019 08:09
11:45

Seanca e sotme që nisi pas orës 10:00 është shtyrë për në orën 14:00.

Në orën 14:00, me kërkesë edhe të disa deputetëve, Kuvendi pritet të diskutojë e të shqyrtojë propozim-rezolutën për “gjenocidin, krimet kundër njerëzimit dhe krimet e luftës të ish-regjimit shtetëror serb në Kosovë”.

11:09

Familjarët e të pagjeturve në sallë por deputetët diskutojnë për çështje tjera

Pavarësisht se sot u prit të diskutohet për gjenocidin e krimet serbe në Kosovë, Kuvendi po diskuton për çështje tjera.

Kuvendi pritej të shqyrtonte sot propozim-rezolutën për “gjenocidin, krimet kundër njerëzimit dhe krimet e luftës të ish-regjimit shtetëror serb në Kosovë”.

Deputeti i AAK-së, Daut Haradinaj propozoi rezolutë për gjenocidin, krimet kundër njerëzimit dhe krimet e luftës të ish-regjimit shtetëror serb në Kosovë, Formimi i Komisionit shtetëror për krijimin e Tribunalit për gjenocidin serb në Kosovë dhe mos të presin familjarët dhe shoqatat e të pagjeturve.

Propozimi i Haradinajt është përkrahur nga VV-ja, AKR-ja, dhe Nisma. Ndërsa, vet Haradinaj tërhoqi propozimin dhe nuk e hodhi në votim. Ai tha se në sallë nuk ka deputetë të PDK-së pasi kanë shkuar në Prizren në Akademinë që pritet të mbahet për Ukshin Hotin.

Deputetë të këtyre partive e quajtën të pafalshme dhe thanë se është mos respekt ndaj familjarëve që janë të pranishëm në Kuvend.

Pritet që shqyrtimi për propozim rezolutën për gjenocidin dhe krimet serbe në Kosovë të nisë në orën 14:00.

10:36

Kuvendi nis diskutimet për draft-rezolutën që fajëson serbët për gjenocid

Kuvendi i Kosovës sot pritet të shqyrtojë një propozim-rezolutë për gjenocidin kundër popullit në Kosovë.

Kryeparlamentari Kadri Veseli ka treguar se në sallë janë 65 deputetë dhe më pas priten pikat e rendit të ditës.

Në Kuvend janë edhe familjarët e personave të zhdukur dhe atyre që janë vrarë.

Veseli njoftoi se seanca do të mbahet në bazë të rendit të ditës, për shkak se edhe disa deputet të PDK-së janë në Prizren, ku do të mbahet Akademia për Ukshin Hotin, ndërsa, në orën 14:00, të nis me shqyrtimin e propozim-rezolutës për gjenocidin, krimet kundër njerëzimit dhe krimet e luftës të ish-regjimit shtetëror serb në Kosovë, Formimi i Komisionit shtetëror për krijimin e Tribunalit për gjenocidin serb në Kosovë.

Diskutimi nisi për arsimin në Kosovë. Deputetja e LDK-së Valentina Bunjaku-Rexhepi, ka nisur diskutimet në seancë në lidhje me testin e diturisë.

08:09

Kuvendi pritet të votojë Rezolutën për gjenocidin serb në Kosovë

Kuvendi i Kosovës do të mbajë sot seancë plenare ku pritet të votohet rezoluta për gjenocidin serb në Kosovë.

Seanca i ka shtatë pika të rendit të ditës, ku ndër të tjera është propozim rezoluta për gjenocidin, formimi i komisionit shtetëror për krijimin e Tribunalit dhe pika tjera që lidhen me gjenocidin.

Këto janë pikat e rendit të ditës:

Koha për deklarime jashtë rendit të ditës,

Koha për pyetje parlamentare,

Shqyrtimi i Propozim-Rezolutës për gjenocidin, krimet kundër njerëzimit dhe krimet e luftës të ish-regjimit shtetëror serb në Kosovë,

Formimi i Komisionit shtetëror për krijimin e Tribunalit për gjenocidin serb në Kosovë,

Vendimi për ndërtimin e Muzeut të Gjenocidit, tek ish – Fabrika e tjegullave,

Vendimi për ndërtimin e Memorialit të dëbimit, tek Stacioni hekurudhor i Prishtinës,

Caktimi i Ditës së Gjenocidit.

© KOHA. Të gjitha të drejtat janë të rezervuara.

Komentet

Shto koment

Të ngjashme