Arbëri

Policia serbe ndalon në kufi këshilltarin e kryeministrit Haradinaj

Foto: Koha / ilustrim

Partia Liberale Serbe njofton se sot në vendkalimin kufitar Dheu i Bardhë është ndaluar anëtari i kësaj partie njëherësh këshilltar i kryeministrit të Kosovës Ramush Haradinaj, Sërgjan Jovanoviq.

Sipas një komunikate nga SLS-ja, thuhet se Policia e Serbisë e ka ndaluar Jovanoviqin duke i thënë se kanë urdhër ta ndalojnë pasi që “dikush duhet të flas me të”.

Sipas komunikatës, Jovanoviq ka një orë që gjendet në kufi dhe për Vranjë është nisur për arsye private.

“Rikujtojmë se muajt e kaluar në Merdare janë ndaluar dhe pyetur nga Policia serbe kryetari Sllobodan Petroviq, anëtarët Boban Stankoviq, Nebojsha Jakovleviq dhe Sreqko Spasiq”, thuhet në komunikatë, shkruan ksp.

SLS thotë se nuk i kupton “këto ndalesa dhe maltretime” dhe për të pestën herë kërkon përgjigje dhe sqarim nga ana e presidentit të Serbisë, kryeministres dhe shefit të Shërbimit Informativ pse përfaqësues të lartë të kësaj partie po ndalohen në territorin e Serbisë.

“Po ashtu për të pestën herë presim reagim konkret nga Bashkimi Evropian dhe të gjitha institucionet vendore dhe ndërkombëtare me rastin e këtyre maltretimeve që po u bëhen anëtarëve të SLS-së”, thuhet në komunikatë.