Më shumë vdekje nëpër aksidente sivjet se një vit më herët Foto: Ilustrim

Sivjet më pak gjoba për shoferët nën ndikim të alkoolit, më shumë për rrip të sigurisë

08 April 2019 20:14
21:14

Rreth 400 gjoba më pak janë shqiptuar në tremujorin e parë të 2019-s në krahasim me të njëjtën periudhë të vitit të shkuar, sa i përket shoferëve nën ndikim të alkoolit.

Jeton Rexhepi, Drejtor për Komunikacion Rrugor në Policinë e Kosovës, në Puls të KTV-së ka bërë të ditur se 606 gjoba janë shqiptuar sivjet për shoferët nën ndikim të alkoolit, ndërsa vitin e shkuar shifra për tre muaj ishte 1023.

Për dallim nga kjo, shumë më shumë gjoba janë ndarë për mungesë të rripit të sigurisë. Më 2019, deri tash janë shqiptuar 11869 gjoba për rrip të sigurisë. Kjo është për më shumë se 3000 gjoba më shumë se një vit më herët për periudhën e njëjtë. Në periudhën janar-mars 2018 ishin shqiptuar 8805 gjoba për rrip të sigurisë.

20:57

Cilët janë shkaktarët më të shpeshtë të aksidenteve në Kosovë

Jeton Rexhepi, Drejtor për Komunikacion Rrugor në Policinë e Kosovës, në Puls të KTV-së ka shpalosur listën e shkaktarëve më të shpeshtë të aksidenteve në Kosovë, për vitin 2018.

Ai ka thënë se shkaktarët më të shpeshtë të dyshuar për aksidente janë manipulimi i pasigurt me automjet, mosmbajtja e distancës e mospërshtatja e shpejtësisë.

Shkaktarët më të shpeshtë (të dyshuar) të aksidenteve për periudhën kohore janar – dhjetor 2018:

18.5 për qind manipulimi i pasigurt me automjet

17 për qind mosmbajtja e distancës së sigurisë mes mjeteve

16.7 për qind mospërshtatja e shpejtësisë ndaj kushteve të rrugës

6.6 për qind kyçje e pasigurt në rrugë

6.2 për qind kthim-rrotullim-lëvizje prapa

6.1 për qind radhitje e parregullt në ndërrim të shiritave

20:44

Kritikohet sistemi i policisë për kontrollim të patentëshoferëve në rrugë

Ismet Rexhepi, kryetar i Federatës së AutoSporteve të Kosovës, ka kritikuar sistemin e Policisë së Kosovës për kontrollim të patentëshoferëve në rrugë.

Në Puls të KTV-së ai ka thënë se manipulimi me patentëshoferë, që merren nga Policia për shkak të kundërvajtjeve, është shumë i lehtë.

Sipas tij, një shofer po e ka të lehtë duplifikimin e dokumentit dhe nëse një leje e vozitjes i merret ai prapë mund të ngasë veturën pa problem. Edhe nëse ndalet sërish nga Policia, sipas Rexhepit, shoferi që është pa leje mund ta dorëzojë dokumentin e rremë dhe ndaj tij s’merret asnjë masë. Ai po ashtu ka thënë se shumë shoferë dalin në rrugë pa leje fare.

Ai ka thënë se grupet e interesit s’po lejojnë funksionalizimin e këtij sistemi e as atij të e-sistemit për pajisje me patentë-shoferë.

Në anën tjetër, Jeton Rexhepi, Drejtor për Komunikacion Rrugor në Policinë e Kosovës, ka pranuar se ka pasur tendenca për mashtrim me patentë shoferë në shumicën e rajoneve në vend, por ka shtuar se nëse dikush e deklaron një dokument të rremë, ndaj tij hapet procedurë penale.

20:14

Më shumë vdekje nëpër aksidente sivjet se një vit më herët

Drejtori i Drejtorisë për Komunikacion Rrugor në Policinë e Kosovës, Jeton Rexhepi, ka bërë të ditur se periudha janar – mars 2019 ka sjellë më shumë vdekje nga aksidentet në Kosovë, se një vit më herët në periudhën e njëjtë.

Në Puls të KTV-së ai ka thënë se numri total i aksidenteve ka pësuar rënie, por janë shtuar ato me fatalitet. Sipas tij, në këtë periudhë të vitit 2019 kanë vdekur shtatë persona më shumë e një vit më herët, ndërsa janë regjistruar gjashtë aksidente fatale më shumë.

Ai po ashtu ka bërë të ditur se numri i kundërvajtjeve është rritur për 18.5 për qind në krahasim me periudhën e njëjtë të vitit të shkuar.

© KOHA. Të gjitha të drejtat janë të rezervuara.

Komentet

Shto koment

Të ngjashme