Qeveria e Serbisë: Mikiq tha një mendim që mbizotëron në mesin e popullit serb

Qeveria e Serbisë: Mikiq tha një mendim që mbizotëron në mesin e popullit serb

25 March 2019 17:24

Zyra për Kosovën në Qeverinë e Serbisë tha se shkarkimi i Vesna Mikiqit nga posti i zëvendësministres së Drejtësisë në Kosovë “është edhe një tjetër provë që (kryeministrit të Kosovës) Ramush Haradinajt i duhen serbë të dëgjueshëm dhe të bindur”.

Kryeministri i Kosovës, Ramush Haradinaj, njoftoi të hënën se ka liruar nga detyra zëvendësministren e Drejtësisë, Mikiq, e cila vjen nga radhët e subjektit politik Lista Serbe.

Haradinaj tha se ky vendim u mor pasi Mikiq deklaroi se bombardimet e NATO-s mbi caqet e ish-Jugosllavisë ishin gjenocid ndaj shtetit dhe popullit serb.

Në reagimin e Zyrës për Kosovën në Qeverinë e Serbisë thuhet se Mikiq, “duke e quajtur agresionin ndaj popullit serb gjenocid dhe separatistët shqiptarë terroristë”, ajo “ka shprehur mendimin që mbizotëron në mesin e popullit serb”.

“Haradinaj dhe bashkëpunëtorët e tij mund t'iu ngrenë edhe dhjetëra monumente agresorëve dhe terroristëve, por populli serb nuk do të detyrohet t'i respektojë ata që i kanë bërë keq”, thuhet në reagimin që e transmeton Shërbimi i Ballkanit i Radios Evropa e Lirë.

Shkarkimin e Mikiqit e dënoi edhe subjekti i saj politik Lista Serbe.

Sipas kryeministrit Haradinaj, deklaratat e Mikiqit janë “të papranueshme dhe përkojnë me gjuhën e urrejtjes”.

Haradinaj tha se Mikiq i bëri komentet në Ministrinë e Drejtësisë.

Lexo edhe: Haradinaj shkarkon zëvendësministren e Drejtësisë Vesna Mikiq

Në vitin 1999, aleanca e NATO-s bombardoi caqet e ushtrisë serbe për t'i dhënë fund luftës në Kosovë.

Sulmet zgjatën 78 ditë, ndërsa përvjetori i 20-të i nisjes së tyre u shënua të dielën.

Komentet

alipash tepelena26/03/2019 15:54

mereni tash ne serbi e le te vazhdon sikur shumica serbo- cetnike

Shto koment

Të ngjashme