Haradinaj dënon “sulmin” ndaj Petroviqit Foto: Ilustrim

Thaçi dënon sulmin ndaj Petroviqit

20 March 2019 13:02
15:01

Presidenti Hashim Thaçi, konsideron se sulmi ndaj deputetit të Kuvendit të Republikës së Kosovës, Sllobodan Petroviq, i cili është edhe kryetar i Partisë Liberale Serbe, është sulm ndaj fjalës së lirë dhe ndaj një përfaqësuesi të zgjedhur të popullit.

“Si President i Republikës së Kosovës e dënoj ashpër këtë sulm dhe nga institucionet e zbatimit të ligjit kërkoj që t’i ndërmarrin të gjitha veprimet e nevojshme që sulmuesit t’i sjellin para drejtësisë”, shkruan Thaçi në reagimin e tij.

“Integrimi institucional dhe pluralizmi politik duhet të jenë vlera të përbashkëta demokratike të të gjithë qytetarëve të Republikës së Kosovës”, ka thënë Thaçi.

14:47

Haradinaj e Veseli dënojnë “sulmin” ndaj Sllobodan Petroviqit

Edhe kryetari i Kuvendit të Kosovës, Kadri Veseli, e ka dënuar sulmin ndaj deputetit të Kuvendit të Kosovës, Sllobodan Petroviq.

Reagimi i Veselit:

Dënoj ashpër sulmin ndaj Deputetit të Kuvendit të Kosovës, z. Sllobodan Petroviq dhe shpreh solidaritetin e mbështetjen ndaj tij. Po ashtu inkurajoj organet ligjzbatuese ta zbardhin në mënyrë të plotë këtë ngjarje të rëndë e të venë para përgjegjësisë së ligjit këdo që qëndron pas saj.

Vlera si liria e mendimit, e besimit dhe e bindjeve vetjake janë në themel të shoqërisë sonë demokratike e askush nuk duhet të lejohet t'i prekë ato nëpërmjet dhunës dhe gjuhës së urrejtjes.

13:02

Haradinaj dënon “sulmin” ndaj Petroviqit

Ndonëse ende nuk janë kryer hetimet për rastin e ndodhur ditën e sotme në një restorant në Prishtinë, ky ka ndodhur një përleshje fizike mes kryetarit të SLS-së, Sllobodan Petroviq dhe dy anëtarëve të Listës Serbe, kryeministri Ramush Haradinaj i ka dalë në mbrojtje Petroviqit.

Kreu i ekzekutivit, rastin e ka quajtur si “sulm ndaj deputetit Petroviq”, rast të cilin edhe e ka dënuar.

“Në emër të Qeverisë së Kosovës, dënoj ashpër sulmin verbal dhe fizik ndaj deputetit të Kuvendit, Sllobodan Petroviq. I papranueshëm çfarëdo sulmi që cenon mendimin e lirë dhe bindjet politike të kujtdo qoftë”, theksoi Haradinaj në një postim në Facebook, raporton Koha.net.

Haradinaj ka ftuar organet e hetuesisë që të zbardhin rrethanat dhe sulmuesit të marrin dënimin e merituar.

Sot në orët e paradites ka ndodhur një përleshje fizike mes kryetarit të SLS-së, Petroviq, dhe dy anëtarëve të Listës Serbe. 

© KOHA. Të gjitha të drejtat janë të rezervuara.

Komentet

Shto koment

Të ngjashme