Sipas Musliut, mediat janë frymëzim për terroristët

Hamiti: Tendencat për përçarjen fetare shqiptare datojnë qysh herët

19 March 2019 20:18
21:27

Profesori universitar, Xhabir Hamiti, në Rubikon të KTV-së, ka thënë se tendencat për përçarjen fetare shqiptare datojnë qysh herët.

“Tendencat e përçarjes së klerit fetar shqiptar datojnë qysh herët. Mua më pëlqejnë më shumë qëndrimi i prijësve fetarë të kohës së Rilindjes, si Gjergj Fishta, Vehbi Dibra si dhe shumë prijës të tjerë fetar të cilët kane qenë gjithnjë të kujdesshëm në predikimet e tyre”, ka thënë Hamiti.

Hamiti ka cituar edhe Fishtën: “është e vërtetë që kemi Bajram dhe Pashk por kombin e kemi të përbashkët”. Ai po ashtu ka thënë se ne jemi komb me dy fe, kemi një gjuhë, një atdhe dhe një gjak.

21:12

Don Shan Zefi: Dikush qëndron prapa sulmit terrorist në Zelandë

Në një video 17-minutëshe të një prej sulmeve që ndodhi në Christchurch të Zelandës së Re, nis me një skenë ku një burrë e identifikon veten si Brenton Tarrant, teksa niset drejt xhamisë, Al Noor, vend në të cilin janë vrarë 50 persona. Në prapavijë, dëgjohet një këngë nacionaliste serbe dhe një zë robotik që drejton Tarrantin në rrugën për ku është nisur.

Kënga është thënë të jetë krijuar më 1995, gjatë luftërave që kanë rezultuar me shpërbërje të Jugosllavisë në vitet 1990, dhe me vdekjen e rreth 130,000 personave. Kënga, që në fillim është quajtur “Karaxhiq, udhëheq serbët e tu”, i referohet liderit të serbëve të Bosnjës, Radovan Karaxhiq, i ashtuquajtur edhe si Kasap i Ballkanit, që është dënuar nga Tribunali Ndërkombëtar më 2016, për gjenocid, krime lufte dhe krime kundër njerëzimit.

“Ujqërit po vijnë, kujdes ustashë dhe turq”, thuhet në një pjesë të tekstit, e cila u referohet luftëtarëve nacionalistë kroatë dhe myslimanëve boshnjakë.

Teksti i këngës është rishkruar disa herë, në shumë gjuhë, mirëpo gjithmonë duke qenë prezente pjesë militante anti-myslimane.

Lidhur me këtë, Don Shan Zefi, në Rubikon të KTV-së tha se qëndron dikush prapa, duke asociuar te shërbimet sekrete meqë një person në atë largësi nuk mund të jetë aq i afërt me historinë shqiptare.

“Mund të them se dikush qëndron prapa, sigurisht se shërbimet sekrete e kanë bërë fjalën e tyre sepse nuk mund të jetë një njeri aq i largët nga Kosova ta dijë historinë e Kosovës. Ka prekur pikërisht në simbolikën e shqiptarëve, në simbolikën e krishterimit, simbolikën që lidhet më shqiptarët, krishterimin dhe islamin”.

“Prapavija është mëse e qartë, thjeshtë po e dëmtojnë këtë popull, çështjen shqiptare, Ballkanin, Evropën dhe Shtetet e Bashkuara”.

20:43

Pse, sipas Perteshit, u sulmua pikërisht Zelanda e Re

Sulmi në Zelandë të Re, sipas hulumtuesit të QKSS-së, Skender Perteshi, kishte për qëllim të çonte mesazhe të frikës kudo në botë.

Sipas tij, kjo ishte pikërisht arsyeja pse u zgjodh Zelanda, e cila njihet si shteti më shkallën më të ulët të krimit dhe demokracinë më të zhvilluar në botë.

“Zelanda e Re njihet si shteti me shkallën më të ulët të krimit në botë dhe demokracinë më të zhvilluar në botë. Është shtet multietnik, me qindra kombësi jetojnë aty dhe qindra gjuhë fliten dhe shumë fe bashkëpunojnë mes vete që e krijojnë një komb”, ka thënë ai.

“Janë mbi 120 kombësi që jetojnë atje, shkalla më e lartë e demokracisë dhe sulmohet Zelanda e Re do të thotë ku gjithkush mund të ndjehet i lirë dhe nuk ka pas ndonjë ekses në bazë qytetare, etnike apo diçka tjetër dhe organizohet sulmi që të përhapet frika në gjithë botën”.

20:34

Zefi: Urrejtja është kur islami dhe krishterimi punojnë për ngushtimin e hapësirës njëra-tjetrës

Don Shan Zefi, kancelar i Ipshekvisë së Kosovës, në Rubikon të KTV-së ka thënë se tendenca, si e fesë islame që të ngushtojë hapësirën e besimit krishterë si anasjelltas, nxit vetëm urrejtje.

“Mendoj që shteti islamik ose feja islame e cila bazohet në politikën që të ngushtohet hapësira e krishterëve kudo nëpër botë nxit urrejtje, nuk lë vend për dialog. Nëse këtë e bënë edhe kisha katolike, edhe krishterët, që të ngushtojnë fushën e besimit islam, njëjtë janë këto”.

“Unë jam optimist se njeriu në këtë shekull të ri duhet të bëjë më shumë, sepse ky shekull dhe fundi i shekullit XX ka prodhuar terroristë”, ka thënë Zefi, derisa ka shtuar se ata janë të ndihmuar edhe nga teknologjia.

20:18

Sipas Musliut, mediat janë frymëzim për terroristët

Mediat konsiderohen si ushqim për terrorizmin modern thotë eksperti i sigurisë, Agim Musliu.

Në Rubikon të KTV-së ai ka thënë se kjo ndodh meqë veprimet e tyre përmes shpërndarjes dhe transmetimit në media marrin jehonë.

“Fryma e cila më së shumti e frymëzon terrorizmin janë mediat. Terrorizmi modern llogarit pikërisht në këtë, në zhvillimin e shpejt të mediave dhe teknologjisë në numrin e madh të mediave dhe në vëllimin e madh të armëve, prodhimtarisë”, ka thënë Musliu.“Si problem global është edhe transmetimi i këtyre akteve terroriste nga mediat”.

Ai përmendi rastin e “Brigadave të Kuqe” të viteve ’70-ta, që ishin në aksion si grupe terroriste në kidnapim e vrasje të politikanëve dhe njerëzve të biznesit, për të bërë presion në pushtet.

“Komisari kryesor i policisë italiane dhe ministri i Brendshëm bashkë me mediat marrin vendim që të mos i transmetojnë më”, shpjegon Musliu.“Pas gjashtë muajsh brigadat e kuqe e shpallin që nuk ekzistojnë më për shkak të mos transmetimit dhe mos mundësisë që të jenë prezent”.

© KOHA. Të gjitha të drejtat janë të rezervuara.

Komentet

Shto koment

Të ngjashme