Rreth 3 orë kanë debatuar një pjesë e ligjvënësve të Kosovës për paratë që u harxhuan në emër të kremtes së 11-vjetorit të shtetësisë së Kosovës.
Mungesa e kuorumit që ka përcjellë seancën, për deputetët e opozitës tregon se ky pushtet nuk ka interes të flasë për keqpërdorimin e parasë publike, raporton KTV.
Deputetët kanë ngritur dyshime rreth mospërputhjes së kontratës që Qeveria e kishte nënshkruar me kompaninë "Dizarium" dhe, sipas tyre, kjo tregon se dikush ka mashtruar dhe ka vjedhur para.
Por, diskutimin për shpenzime të parasë publike, e vlerësuan të kotë partitë në pushtet.
Kryeministri Ramush Haradinaj pati tjetër shpjegim për gjysmë milionin e ndarë për festën e pavarësisë.
Sipas Haradinajt, nga paratë e ndara, vetëm 175 mijë euro u harxhuan dhe të tjerat do t’i kthehen buxhetit.
Ministri i Financave, Bedri Hamza, tha se nuk ka krizë makroekonomike, duke shtuar se Qeveria Haradinaj, nuk është e vetmja që ka marrë para nga rezerva shtetërore.
Megjithatë, rezoluta e propozuar nga LDK-ja, nuk doli fare në votim për shkak të mungesës së kuorumit.
Rezoluta ka vetëm 2 pika, ndalimin ndarjes së parave nga rezerva shtetërore pa kritere, si dhe obligimin e Qeverisë që brenda një periudhe të shkurtër kohore të raportojë për paratë e shpenzuar për 11-vjetorin e pavarësisë dhe 551-vjetorin e vdekjes së Skënderbeut.
-
12 mars 2019 20:06
-
Shpërndaje në: