Murati po e sheh mundësinë e përfshirjes së drejtpërdrejt të SHBA-së në dialog Foto: Driton Paçarada / Koha

Murati po e sheh mundësinë e përfshirjes së drejtpërdrejt të SHBA-së në dialog

09 March 2019 20:18

Kryetari i Lëvizjes për Bashkim, Valon Murati, ka vlerësuar se dobësimi i brendshëm i BE-së, destruktiviteti i vazhdueshëm i Beogradit, vendosja e taksës nga ana e Kosovës si masë reciprociteti e Platforma për bisedime, po çojnë drejt kolapsit të bisedimeve në formatin e tanishëm.

E krejt këto veprime, Murati po i sheh si shtrim i rrugës për përfshirjen e drejtpërdrejtë të SHBA-së në dialog.

“Dialogut të tejzgjatur a pa farë rezultati konkret të Brukselit, ku është folur vetëm për Kosovën dhe pozitën e serbëve në të, si duket po i vjen fundi. Të gjitha indikacionet janë se po krijohen kushtet që SHBA-ja ose të përfshihen më aktivisht ose edhe ta marrin rolin prijës në procesin e dialogut Kosovë-Serbi”, ka thënë Murati në një postim në Facebook.

Ai thotë se nuk janë të rastësishme vizitat e zyrtarëve të lartë amerikanë në Prishtinë, deklarimet e tyre për domosdonë e një marrëveshjeje në mes të Kosovës dhe Serbisë e deri tek përfshirja përmes letrave e deklaratave edhe e Presidentit Trump e Sekretarit të Shtetit Pompeo.

“Kjo përfshirje e amerikanëve dhe zgjidhjet që mund të vijnë, duhen shikuar edhe nën prizmin e përpjekjeve amerikane për të ndalur depërtimin çdo herë e më të hapur të interesave ruse në rajonin e Ballkanit”, është shprehur kreu i Lëvizjes për Bashkim, Valon Murati.

© KOHA. Të gjitha të drejtat janë të rezervuara.

Komentet

Shto koment

Të ngjashme