Posta thotë se Telekomi dhe Qeveria i kanë borxh mbi 5 milionë euro Foto: Driton Paçarada / Koha

Posta thotë se Telekomi dhe Qeveria i kanë borxh mbi 5 milionë euro

28 February 2019 11:04

Posta e Kosovës ndodhet në situatë shumë të vështirë financiare për shkak të borxheve të papaguara nga ndërmarrja publike Telekomi i Kosovës dhe Qeveria e Kosovës.

Kështu thuhet në një komunikatë për media të Postës, ku është theksuar se me gjithë përpjekjet e menaxhmentit, Bordit të drejtorëve dhe Sindikatave të punëtorëve të Postës për të gjetur zgjidhje me Telekomin dhe Qeverinë që të paguhen borxhet, nuk është arritur asnjë rezultat konkret dhe si pasojë Posta nuk ka asnjë mundësi të paguaj pagat e mbi një mijë punëtorëve.

“Për më tepër, nëse nuk tejkalohet kjo gjendje, Posta së shpejti do të përballet edhe me paralizim total të funksionimit, përkatësisht pamundësisë së ofrimit të çfarëdo shërbimi. Telekomi (Vala) i ka borxh Postës së Kosovës rreth gjysmë milioni euro për qiranë e objekteve dhe shërbimet që Posta i kryen për Telekomin. Për këtë gjendje, menaxhmenti dhe Bordi i Drejtorëve i kanë njoftuar zyrtarisht kryeministrin Ramush Haradinaj, ministrin e MZHE-së, Valdrin Lluka, ministrin e Financave, Bedri Hamza si dhe menaxhmentin dhe Bordin e Telekomit. Nga këto institucione kemi kërkuar angazhim urgjent për shlyerjen e borxheve ndaj Postës së Kosovës”, thuhet në komunikatën e Postës.

Përndryshe, Posta thotë se ka disa vite që menaxhmenti, Bordi dhe Sindikatat e punëtorëve të Postës i kanë bërë thirrje Qeverisë së Kosovës si dhe komisioneve relevante parlamentare që të paguhet borxhi i Qeverisë ndaj Postës, prej mbi 5 milionë euro, për mbulimin e humbjeve në shërbimin universal postar, që është obligim ligjor i ekzekutivit.

© KOHA. Të gjitha të drejtat janë të rezervuara.

Komentet

Shto koment

Të ngjashme