Haradinaj kërkon mbështetjen e Holandës në procesin e liberalizimit të vizave

Haradinaj kërkon mbështetjen e Holandës në procesin e liberalizimit të vizave

16 February 2019 13:05

“Holanda i ka dhënë shumë Kosovës në etapat më të rëndësishme historike të Kosovës dhe Kosova është përherë mirënjohëse”, kështu tha Kryeministri Haradinaj pas takimit me ministrin e Punëve të Jashtme të Mbretërisë së Holandës, Stef Blok, me të cilin ka biseduar për zhvillimet politike në Kosovë dhe rajon, si dhe për thellimin e bashkëpunimit ndërmjet dy shteteve.

Gjatë takimit, Haradinaj e ka njoftuar ministrin Blok, për të arriturat e Kosovës, për prioritetet e Qeverisë në zhvillimin ekonomik, fuqizimin e sundimit të rendit dhe të ligjit, përmbushjen e obligimeve që dalin nga MSA dhe përkushtimin për raporte të mira fqinjësore.

“Kosova është e interesuar që bashkëpunimi politik dhe ekonomik me Holandën të avancohet dhe ne kemi nevojë edhe në këtë fazë të konsolidimit të vendit për mbështetje politike nga ky vend” , tha kryeministri Haradinaj, duke kërkuar nga ministri i Jashtëm, Stef Blok mbështetjen e tij dhe të shtetit holandez për procesin e liberalizimit të vizave dhe anëtarësimin e vendit në organizata të rëndësishme ndërkombëtare.

Më tej, Haradinaj ka thënë se Qeveria e Kosovës është duke punuar vazhdimisht në përmirësimin e klimës së të bërit biznes, ka krijuar zona të lira ekonomike në të gjithë vendin, të cilat do t’i hapin mundësi investitorëve potencial vendorë dhe të huaj.

Haradinaj e ka njoftuar ministrin e Jashtëm holandez edhe për procesin e dialogut për normalizimin e marrëdhënieve ndërmjet Republikës së Kosovës dhe Serbisë, përmes një marrëveshje ligjërisht obliguese, e cila do të jetë kontribuuese e rëndësishme në stabilitetin rajonal dhe më gjerë.

Ministri i Punëve të Jashtme të Mbretërisë së Holandës, Stef Blok, në takim me kryeministrin Haradinaj ka vënë theksin në marrëdhëniet e mira bilaterale ndërmjet dy shteteve. Duke vlerësuar arritjet e Kosovës, ai ka shprehur gatishmërinë e tij dhe të shtetit holandez për të vazhduar mbështetjen për Kosovën në rrugën e saj eurointegruese dhe euroatlantike.

© KOHA. Të gjitha të drejtat janë të rezervuara.

Komentet

Shto koment

Të ngjashme