Së shpejti nis projekti për kthimin e shisheve të plastikës, qelqit dhe kënaçeve

Së shpejti nis projekti për kthimin e shisheve të plastikës, qelqit dhe kënaçeve

22 January 2019 13:17

Ministri i Mjedisit dhe Planifikimit Hapësinor, Fatmir Matoshi, ka takuar sekretaren e parë të Ambasadës Gjermane në Kosovë, Anja Becky, udhëheqësen e projektit, Alexandra Linden dhe përfaqësues tjerë të GIZ-it gjerman, ku është prezantuar projekti i krijimit të sistemit të kthimit të depozitave, projekt ky i cili do realizohet nga MMPH-ja, me përkrahjen GIZ-it.

Me këtë rast, ministri Matoshi ka ofruar mbështetjen për realizimin e këtij projekti i cili tha se do të ndikojë në krijimin e një mjedisi të pastër.

“Projektin e krijimit të sistemit të kthimit të depozitave do ta fillojmë këtë vit, me përkrahjen e GIZ-it dhe po kështu kërkojmë përkrahjen e të gjithëve, në mënyrë që ta bëjmë Kosovën të pastër dhe të dëshmojmë që ne e duam shtetin tonë të ndërtuar me shumë sakrifica”, deklaroi Matoshi.

I pari i MMPH-së tha se në këtë projekt do të përfshihet kthimi i shisheve të plastikës, qelqit dhe kënaçet.

“Shishet e plastikes, qelqit dhe kënaçet së shpejti do të përfshihen në një sistem të kthimit të tyre, në mënyrë që të mbrohet mjedisi dhe të kemi riciklim të mbeturinave në vend”, deklaroi Matoshi.

Ai tha se ndotja e mjedisit nga plastika është një nder problemet që ka Kosova në fushën e mjedisit.

Ministri falënderoi Qeverinë gjermane dhe GIZ-in për bashkëpunimin e vazhdueshëm në fushën e mjedisit.

Ndërsa përfaqësuesit e ambasadës gjermane dhe GIZ-it kanë ofruar mbështetje për MMPH-në në realizimin e projekteve që janë parapara për mjedisin.

Në realizimin e këtij sistemi, Kosova do të marrë model shtetin e Estonisë dhe Lituanisë si vende që kanë këtë sistem të avancuar të depozitave dhe njihen si shtete ekologjike.

© KOHA. Të gjitha të drejtat janë të rezervuara.

Komentet

Shto koment

Të ngjashme