Arbëri

Qeveria ende s’e ka shkarkuar, Rikallo në Berlin për “International Green Week” takon Merkelin

Qeveria e Ramush Haradinajt është zotuar se do të përmbushë pesë kushtet e PSD-së, për të mundur të ketë votat për miratimin në lexim të dytë të Buxhetit të shtetit, e njëra prej tyre është edhe shkarkimi i ministrit nga Lista Serbe, Nenad Rikallo.

Ka dy javë që burime brenda Qeverisë janë deklaruar se kjo do të ndodhë.

Por kjo nuk e ka penguar ministrin e Bujqësisë, Pylltarisë dhe Zhvillimit Rural, Nenad Rikallo, që me ftesë të ministres së Ushqimit dhe Bujqësisë të Gjermanisë, Julia Klockner të marrë pjesë sot në Forumin Global për Ushqim dhe Bujqësi 2019, në Berlin të Gjermanisë.

Sipas njoftimit për media, në këtë forum, i cili mbahet në kuadër të Panairit ndërkombëtar “International Green Week”, kancelarja gjermane, Angela Merkel, ka pritur në takim ministrat e bujqësisë nga vende të ndryshme të botës, në të cilin takim ka marrë pjesë edhe ministri Rikalo. Aty thuhet se gjatë fjalimit të saj, kancelarja Merkel ka folur për rëndësisë e teknologjisë digjitale për të ardhmen e bujqësisë.

Ndërkohë, gjithnjë sipas njoftimit, ministri Rikalo, ka zhvilluar takime me homologët e tij nga vendet pjesëmarrëse në këtë forum, por edhe me përfaqësues të institucioneve dhe organizatave të ndryshme të bujqësisë nga Gjermania dhe vende të tjera.

“MBPZHR-ja edhe gjatë këtij viti do të vazhdojë mbështetjen e zhvillimit të bujqësisë në vend, me qëllim të rritjes së prodhimit bujqësor dhe zhvillimit të bizneseve në këtë fushë që do të shtojnë vende të reja të punës por edhe do të rrisin cilësinë dhe sasinë e produkteve vendore. Po ashtu, jemi të fokusuar dhe të gatshëm për vazhdimin e bashkëpunimit rajonal dhe ndërkombëtar në fushën e bujqësisë”, ka thënë ministri Rikalo, gjatë takimit me homologët e tij të vendeve të ndryshme të botës.

Sipas një komunikate të Ministrisë së Bujqësisë, krahas këtyre takimeve, ministri Rikalo do të marrë pjesë edhe në hapjen e ngjarjes më të rëndësishme për bujqësinë dhe ambientin, “Java e Gjelbër Ndërkombëtare”, që po ashtu mbahet në Berlin, në të cilin prezantohen dhjetëra shtete nga e mbarë bota.

Ndërkaq, pjesë e delegacionit të MBPZHR-së është edhe Sekretari i Përgjithshëm i ministrisë, Kapllan Halimi.