VV: Qeveria Haradinaj ka në plan të kapë të gjitha bordet publike, sidomos Telekomin Foto: Vetëvendosje

VV: Qeveria Haradinaj ka në plan të kapë të gjitha bordet publike, sidomos Telekomin

12 January 2019 14:57

Moszbatimi i dymbëdhjetë pikave të rezolutës së miratuar në Kuvendin e Kosovës, tash e gjashtë muaj për ndërmarrjet publike të Telekomit dhe Postës së Kosovës, ka bërë që Lëvizja Vetëvendosje të kërkojë që sa më parë, në mënyrë urgjente, kryeministri Ramush Haradinaj të marrë vendim që të gjitha ato pika të zbatohen nga qeveria e tij.

Duke sqaruar secilën pikë të kësaj Rezolute, drejtuesi i Komitetit për Komunikimet elektronike dhe postare në VV, Fatban Bunjaku tha se “Qeveria Haradinaj dëshmoi për më shumë se një vit se ka plan për të kapur bordet e ndërmarrjes kryesore publike apo agjencive që menaxhojnë me asetet e vendit. U emëruan dhjetëra anëtarë bordesh pa kompetencë profesionale, me kriterin partiak sipas partive të koalicionit. U dëshmua paaftësia e tyre por edhe vrulli i tyre për keqpërdorime. Bordet e AKP-së, KEK-ut, Trepçës, etj, bartin të njëjtat probleme në thelb me atë të Bordit dhe drejtuesve të Telekomit”.

“Qeveria e ka populluar e i ka qarkulluar në Bord e në pozita menaxheriale, individë nga kontingjenti i militantëve, sipas ndarjes aktuale të pushtetit. E vuri në krye të Telekomit Gent Begollin, që në fillim na thoshte se kishte plane të mëdha, pastaj papritmas dha dorëheqje, për t’u zëvendësuar me z. Trim Musliun, e pastaj me z. Bedri Istrefin. Më pas, kryeministri na tha se për Telekomin nuk ka shpresë”, shtoi Bunjaku.

E vetmja pikë e Rezolutës që ka filluar të zbatohet është pika e pestë e Rezolutës ku obligohet Auditori Përgjithshëm që të fillojë auditimin e Telekomit. Mirëpo vet ky auditim është bllokuar pasi që në krye të këtij funksioni është vendosur Shehide Qerimi-Lushtaku, gruaja e deputetit të PDK-së, Mergim Lushtaku.

Në anën tjetër Profesori Salem Lepaja foli për heshtjen që Qeveria po i bën kësaj Rezolute dhe vazhdimin e marrëveshjes së dëmshme me Z-Mobile që po shkatërron Telekomin.

“Sot janë mbushur 6 muaj nga nxerrja e kësaj rezolute lidhur me situatën në ndërmarrjet publike të Telekomit dhe të Postës së Kosovës nga Kuvendi i Kosovës dhe Rezoluta heshtet nga Qeveria derisa marrëveshja abuzive e Telekomit të Kosovës me kompaninë Z-Mobile vazhdon, pra vazhdon plaçkitja e Telekomit të Kosovës nga MVNO të cilën e krijoi vetë”, tha Lepaja.

Më tej, zyrtarët e VV-së thanë se Qeveria e Kosovës nuk e ka patur të vështirë ta ndërpresë këtë kontratë shumë të dëmshme pasi që Qeveria zotëron 100% të aksioneve të Telekomit të Kosovës dhe krejt çka duhet të kishte bërë Kryeministri për ta ndalur plaçkitjen, është të urdhëronte Valdrin Lluka, ministrin për Zhvillim Ekonomik, ta suspendojë këtë kontratë menjëherë.

Lepaja tha se Sot bëhet gjysmë viti nga nxjerrja e kësaj Rezolute në Parlamentin e Kosovës. “Mirëpo Rezoluta heshtet kurse kriza e orkestruar në Telekomin e Kosovës vazhdon të thellohet. Pse Kryeministri, me 35 këshilltarë nuk e kryen obligimin e tij? Pse nuk i raporton Kuvendit për masat e marra në Telekomin dhe Postën e Kosovës. Duke mos zbatuar rezolutën e Kuvendit, duke e injoruar Kuvendin, Qeveria e Kosovës nuk po i respekton themelet e Republikës sonë parlamentare”, tha Lepaja.

Profesori Salem Lepaja po ashtu foli edhe sa i përket operatorit serb “mts D.O.O.”, të cilët janë pajisur me licencë “të kufizuar” e që në realitet, sipas tij, është e pakufizuar sepse nuk ka datë të caktuar për validetin e saj. “Gjithashtu dihet se Operatori serb licencën për shërbime mobile e ka marrë në mënyrë joligjore pasi që nuk është respektuar ligji për komunikime elektronike i Republikës së Kosovës”, tha ai.

Një problem tjetër, sipas VV-së, është edhe implementimi kodit +383 që është obligim i operatorëve të shërbimeve mobile dhe fikse në Kosovë, mirëpo është obligim edhe i ARKEP-it, si institucioni më përgjegjës për këtë çështje shumë të rëndësishme. “Posedimi dhe jetësimi i kodit shtetëror është jetësim i sovranitetit në sektorin e komunikimeve elektronike në Republikën e Kosovës. Ne kërkojmë nga ARKEP angazhim më të përgjegjshëm në implementimit te kodit shtetëror +383”, thanë në VV.

“Shkatërrimin e Telekomit do të mund ta kishin ndalur edhe dy zyrtarë tjerë duke e ndërprerë kontratën abuzive të Telekomit të Kosovës dhe kompanisë Dardafone.net L.L.C, përkatësisht Z-mobile, por nuk po e bëjnë, e këta zyrtarë janë: Prokurori i shtetit Aleksandër Lumezi dhe Kryeprokurori i Prokurorisë Speciale Reshat Millaku, të cilët nuk e hetuan kurrë këtë kontratë kriminale. Pra Pokuroria e shtetit nuk po e zbaton rezolutën e Kuvendit, në një shtet ligjor e demokratik”, shtojnë zyrtarët e VV-së.

“Duke kërkuar zbatimin e menjëhershëm të Rezolutës së Kuvendit të Kosovës për Telekomin, ne kërkojmë hetim në tërësi të kontratës me Dardofon.net L.L.C. Lëvizja Vetëvendosje nuk do të lejojë shkatërrimin dhe tjetërsimin e pasurisë kombëtare publike siç është Telekomi i Kosovës”, përfunduan zyrtarët e VV-së.

Komentet

Shto koment

Të ngjashme