Letra e Përfaqësueses së partë për politikë të Jashtme dhe Siguri, dhe Komisionerit për Zgjerim dërguar sot Qeverisë së Kosovës është përpjekje për ta kontestuar kornizën demokratike të vendimmarrjes së Republikës së Kosovës, thotë përmes një komunikate për media Grupi për Studime Juridike dhe Politike – GLPS.

“Letra në fjalë imponon qartë qëllimin që përfaqësuesi i vetëm në dialog të jetë presidenti i vendit, Hashim Thaçi. Në këtë mënyrë, lë të nënkuptohet se Kuvendi dhe Qeveria, apo kushdo tjetër nuk mund të ushtrojë mandatin përfaqësues dhe kushtetues në këtë proces. Rikujtojmë që roli i BE-së është lehtësimi i procesit të dialogut, dhe në një rol të tillë BE-ja supozohet që të ndihmojë në arritjen e një marrëveshjeje që është e pranueshme dhe që është reflektim i drejtë i institucioneve demokratike të të dyja palëve. Një proces i tillë nuk mund të shërbej si instrument për të rregulluar raportet e fuqive të liderëve politikë ose të riaranzhojë kompentencat të përcaktuara, në rastin tonë, në Kushtetutë”, thuhet në komunikatë, transmeton Koha.net.

GLPS shton se kjo letër duket të ketë qëllim neutralizimin e plotë të rolit përfaqësues dhe përcaktues të Kuvendit të Kosovës në një proces që pritet të përcaktojë të ardhmen paqësore të Kosovës në raport me Serbinë.

“Në një demokraci parlamentare, siç është Kosova, institucioni i parlamentit gëzon rol qendror në përcaktimin e pozicionit negocioues në rastet kur diskutohen çështje të rëndësisë së jashtëzakonshme, sikurse është marrëveshja finale me Serbinë. Rrjedhimisht, kushdo që synon ta tejkalojë një rol të tillë i shërben të kundërtës së qëllimit të normalizimit të marrëdhënieve. BE-ja nuk mund të ndërhyjë në dialog në formë të tillë që cenon rendin minimal të demokracisë së brendshme që është e përcaktuar qartazi në kushtetutën e vendit”, thuhet në komunikatë.

GLPS-ja ka kërkuar nga krerët e shtetit që të refuzojnë një thirrje të tillë.

“I kërkojmë Presidentit, Qeverisë dhe Kuvendit të refuzojë t’i përgjigjet thirrjeve që përfaqësimi i Kosovës në forumet ndërkombëtare, përfshirë dialogun, të modelohet sipas kërkesave që nuk përkojnë me rendin dhe kompetencat kushtetuese, rregullat minimale të demokracisë parlamentare, dhe fuqisë politike të aktorëve brenda Kuvendit. Në të kundërtën përfaqësimi i Kosovës dhe fati i saj në proceset ndërkombëtare do të mbetet i lidhur me emrat individual, e jo vlerat, qëllimet e parimet e pritura që janë me karakter universal. znj. Mogherini dhe z. Hahn duhet të kenë të qartë që veprimet e tilla kanë ndikimin të drejtpërdrejt në sentimentin pro-evropian të qytetarit të Republikës së Kosovës”, thotë GLSP.